Rain Shortage: खानदेशात मका पिकासाठी पावसाची प्रतीक्षा

Jalgaon News: खानदेशात मक्याची लागवड किंवा पेरणी यंदा वाढली आहे. यातच पिकात खते देण्यासह आंतरमशागत झाली आहे. पिकास आता पावसाची गरज आहे. लागवडीनंतर अपवाद वगळता जोरदार पाऊस झालेला नाही.

जुलैमध्ये लागवड केलेल्या पिकात अमेरिकन लष्करी अळीचा प्रादुर्भाव वाढत आहे. शेतकरी फवारणी घेत आहेत. दोन महिन्यांच्या पिकात फवारणी घेऊनही अळीचा अटकाव होत नसल्याने शेतकरी जेरीस आले आहेत. यात पाऊस नाही. ऊन पडत आहे. मका पिकास पाऊस व खतांची अधिक गरज असते. यंदा चांगला पाऊस होईल या अपेक्षेने अनेकांनी मका लागवड केली. जळगाव जिल्ह्यातील मका लागवड ४० हजार हेक्टरने वाढून एक लाख ९० हजार हेक्टरपर्यंत पोचली आहे.

खानदेशात यंदा सुमारे अडीच लाख हेक्टरमध्ये मक्याची लागवड झाली आहे. कापूस पीक परवडेनासे झाले आहे त्यामुळे यंदा मका लागवड वाढली आहे. अतिपावसातील नुकसानही मका पीक सहन करते. त्यामुळे शेतकऱ्यांनी मक्याला पसंती दिली आहे. खानदेशात गेल्या रब्बी हंगामात मक्याची लागवड सुमारे सव्वा लाख हेक्टरवर झाली होती.

शेतकऱ्यांच्या उत्पादन खर्चात वाढ

अमेरिकन लष्करी अळीचा प्रकोप आणि वाढता उत्पादन खर्च यामुळे अनेक शेतकऱ्यांचा खर्च वाढला आहे. शेतकऱ्यांना सध्या पावसाची प्रतीक्षा आहे. पाऊस राहिल्यास अळीची समस्या दूर होते. फवारणीचाही फायदा होतो. लागवडीनंतर पिकात २० ते २२ दिवसांत अमेरिकन लष्करी अळीचा प्रकोप दिसला आहे. यामुळे शेतकरी अळी, कीडनाशकांची फवारणी घेत आहेत. दीड महिन्याच्या पिकात दोनदा फवारणी घ्यावी लागली आहे. एकरी दोन हजार रुपये, एवढा फवारणीसाठीचा एकावेळचा खर्च आला आहे.

नुकसान पातळी वाढणार

कमी पावसासह कीड, रोगराईच्या प्रादुर्भावामुळे मका पिकाचे किमान २० ते २५ टक्के नुकसान झाले आहे. पोंग्यात अळीचे वास्तव्य आहे. पाने कुरतडलेली येत आहेत. पीक पिवळे पडत आहे. शेतकरी खते, फवारणी घेत आहेत. पण पाऊस नाही. धुळे जिल्ह्यातील शिरपूर, शिंदखेडा, धुळे या भागांत तर जळगाव जिल्ह्यात जळगाव, चोपडा, यावल आदी भागांत मका पिकात लष्करी अळीचा प्रकोप आहे. काही भागांत पीक दीड महिन्याचे आहे. तर काही भागांत पीक ५० ते ५२ दिवसांचे आहे.