Animal Vaccination : सांगली जिल्ह्यात १२ हजार पशूंना लाळ खुरकत लसीकरण

Sangli News : सांगली जिल्ह्यातील जनावरांना लाळ खुरकतच्या लसींचा तुटवडा असल्याने डिसेंबर महिना संपला तरी पशूसंवर्धन विभागाने लसीकरण सुरु केले नसल्याचे चित्र आहे. सध्या ४० हजार लाळ खुरकतच्या लसी उपलब्ध असल्याने कारखाना आणि जिल्ह्याच्या सीमेवरील १२ हजार पशुधनाला लसीकरण केले आहे. मात्र, ८ लाख ६ हजार ७५४ जनावरांना लसीकरण झाले नसल्याने जिल्ह्यातील पशुपालकांना डिसेंबरमध्ये येणाऱ्या ‘लाळ्या खुरकत’ रोगाची धास्ती लागली आहे.

जिल्ह्यात गायींची संख्या ३ लाख २४ हजार ७५६ तर म्हैशींची ४ लाख ९३ हजार ९९८ अशी एकूण ८ लाख १८ हजार ७५४ जनावरांची संख्या आहे. दरवर्षी प्रतिवर्षी ऑगस्ट ते सप्टेंबर दरम्यान (एफ. एम. डी.) तोंडखुरी पायखुरी/ लाळ्या खुरकत या रोगाची लागण जनावरांना होऊ नये, यासाठी प्रतिबंधक उपाय म्हणून या रोगाचे लसीकरण केले जाते. मात्र, जिल्ह्यात ४० हजार लाळ खुरकतच्या लसी शिल्लक होत्या.

साखर कारखाने सुरु झाले आहेत. याठिकाणी ऊस तोडणी मजूरांकडेही जनावरे असतात. त्यामुळे पशुसंवर्धन विभागाने कारखाना आणि जिल्ह्याच्या सीमेवरील १२ हजार जनावरांना लसीकरण केले आहे.

वास्तविक पाहता सप्टेंबर महिन्यापर्यंत लसीकरण पूर्ण होणे अपेक्षित होते. मात्र, लाख खुरकतच्या लसींची कमतरता असल्याने जिल्ह्यातील जनावरांना लसीकरण करण्याची मोहिम राबवली नाही. परिणामी डिसेंबर संपत आला तरी अजूनही संबंधित विभागाकडे लस उपलब्ध नाही. त्यामुळे ८ लाख ६ हजार ७५४ जनावरांचे लसीकरण अद्यापही झाले नाही. त्यामुळे लसीकरण करण्यासाठी शासकीय, खासगी प्रशासन गांभीर्याने पाहत नसल्याचे चित्र आहे.

लस कधी उपलब्ध होणार?

जिल्ह्यात लाळ खुरकत लसींचा तुडवडा आहे. त्यामुळे लसीकरण करण्यास अडचणी आहेत. लसीकरण पूर्ण करण्यासाठी पशुसंवर्धन विभागाने राज्य शासनाकडे ६ लाख ९५ हजार ९०० लसींची मागणी केली आहे. मात्र, अद्यापही लसी उपलब्ध झाल्या नाहीत. त्यामुळे लस कधी उपलब्ध होणार असा प्रश्न पशूपालक करत आहेत.

‘लाळ्या खुरकत’ची लक्षणे...

सुरवातीस जनावरांना ताप येतो

जिभेला, पायात खुरांना जखमा

चारा, पाणी खाणे बंद झाल्याने जनावरे क्षीण

दूध उत्पादन घटल्याने आर्थिक नुकसान

संकरित जनावरे या आजाराला अधिक बळी

जिल्ह्यातील एकूण पशुधन

गाय ३ लाख २४ हजार ७५६

म्हैस ४ लाख ९३ हजार ९९८

शेळी ४ लाख ५४ हजार १२५

मेंढी १ लाख ३० हजार ७५४