Paddy Harvesting : मुळशीत भात काढणीसाठी यांत्रिकीकरणाचा वापर; भात काढणीची लगबग

Pune News : मुळशी तालुक्यात भात काढणीची मोठी लगबग सुरू आहे. तसेच मजूरटंचाईमुळे व कमी वेळेत काम करण्यासाठी शेतकरी भात कापणी यंत्राचा मोठ्या प्रमाणावर वापर करू लागले आहेत.

तालुक्याच्या पूर्व भागात भात काढणी यंत्राचा प्रामुख्याने वापर होत आहे. घोटावडे, भरे, लवळे, पिरंगुट, रिहे, जवळ, कासारअंबोली, उरवडे तसेच पौड ते माले, कोळवण खोऱ्यातील शेतकरी यंत्रांचा वापर करत आहेत.

एका तासात एक एकर कापणी व मळणी करून होते. त्यास सध्या चार हजार दर आकारला जात आहे. तालुक्यातील काही शेतकऱ्यांनी अशी यंत्रे विकत घेतली आहेत. त्याचे भाडे चांगले मिळत असल्यामुळे त्यांना उत्पन्नाची सोय झाली आहे.

तालुक्यात कुशल शेत मजुरांची मोठी टंचाई आहे. मजुरीचे दर वाढले आहेत. तसेच मजुरांकडून भात कापणी केल्यावर ते खाचरात दोन दिवस वाळत घालावे लागते. त्या दरम्यान पाऊस झाला तर मोठे नुकसान होऊन तांदूळ डागाळलेला मिळतो व विकला जात नाही, असे घोटावडे येथील शेतकरी शंकर शेळके यांनी सांगितले.

भात कापणी झाल्यावर त्याची झोडणी करावी लागते. उफणणी केल्यावर भात मिळतो. या दरम्यान मोठ्या प्रमाणावर वेळ व मजूर लागतात. त्या कामांना एकरी १५ ते २० हजार रुपये खर्च येतो, असे रिहे खोरेतील शेतकरी विलास केमसे यांनी सांगितले.