Rain Crop Damage: बुलडाणा आणि अकोला जिल्ह्यात अवकाळी पाऊस; ४२०० हेक्टरवरील पिकांचे नुकसान!

Buldana News: मागील २४ तासांत जिल्ह्यात नऊ तालुक्यांत वादळी पावसाने धुळधाण उडवून दिली. या आपत्तीत सुमारे ४२०० हेक्टरवरील पिकांचे नुकसान झाल्याचा प्राथमिक अंदाज कृषी विभागाने वर्तविला आहे. यात सर्वाधिक नांदुरा तालुक्यात १६५५ हेक्टरचे नुकसान झालेले आहे.

या भागात दोन दिवसांपासून ढगाळ वातावरण असून कधी हलक्या सरींनी हजेरी दिली. मात्र बुधवारी (ता. दोन) रात्री बुलडाणा, चिखली, नांदुरा, मोताळा, मलकापूर, खामगाव, नांदुरा, जळगाव जामोद, संग्रामपूर या तालुक्यांमध्ये वादळी पाऊस झाला. यामुळे मका, कांदा, ज्वारी, गहू, संत्रा, लिंबू, पपई, आंबा, भुईमूग, भाजीपाला व इतर फळपिकांचे अतोनात नुकसान झाले.

जिल्ह्यात सर्वाधिक १६५५ हेक्टरवरील पिकांचे नुकसान नांदुऱ्यातील आहे. या पाठोपाठ खामगाव तालुक्यात ९५४ हेक्टर, मोताळा ७०२ हेक्टर, संग्रामपूर ५९९ हेक्टर, बुलडाणा ८३, मलकापूर ९०, चिखली १२, जळगाव जामोद ८७ हेक्टरवरील पिकांचे नुकसान झाल्याची माहिती समोर आली आहे. उपरोक्त तालुक्यात ४१८२ हेक्टरवर नुकसान झाले.

अकोल्यात पिकांचे नुकसान

गेल्या २४ तासांत अकोला, बुलडाणा जिल्ह्यात पावसामुळे पिकांचे मोठे नुकसान झाले आहे. मका, ज्वारी, कांदा, आंबा, केळी व इतर पिकांचे नुकसान झाल्याचे समोर आले आहे. बुधवारी रात्री उशिरा पावसाला सुरुवात झाली. तेल्हारा, बार्शीटाकळी, बाळापूर या तालुक्यांमध्ये पाऊस झाला. तेल्हारा तालुक्यात पावसामुळे शेतातील पिकांचे मोठ्या प्रमाणात नुकसान झाले. गहू, ज्वारी, कांदा, आंबा, केळी पिकाचे नुकसान झाले आहे.