Unseasonal Rain : सोलापूर जिल्ह्यात अवकाळीचा तडाखा

Solapur News : जिल्ह्यात सलग दुसऱ्या दिवशी गुरुवारी (ता. ११) रात्री वादळी वाऱ्यासह अवकाळी पावसाने हजेरी लावली. या पावसाने शेतकऱ्यांची चांगलीच धावपळ उडाली. उन्हाळी पिकांसह फळबागांचे नुकसान झाले. तसेच वीज पडल्याने अंजनगाव खेलोबा (ता. माढा) येथे दोन जर्सी गाई आणि काटेगाव (ता. बार्शी) येथे एक बैल अशा तीन जनावरांना आपला जीव गमवावा लागला.

गेल्या काही दिवसांपासून जिल्ह्यातील तापमान तब्बल ४३ अंश सेल्सिअसवर आहे. त्यात अलीकडच्या दोन दिवसांत १-२ अंशांनी घट झाली असली, तरी सरासरी तापमान ४० अंश सेल्सिअसच्या पुढेच आहे. मात्र बुधवारी (ता. १०) रात्री पावसाने हजेरी लावली. त्यात फारसा जोर नव्हता, पण गुरुवारी रात्री अनेक भागांत पाऊस झाला.

प्रामुख्याने उत्तर सोलापूर, दक्षिण सोलापूर, माढा, बार्शी, सांगोला, मंगळवेढ्यात पावसाचा जोर राहिला. माढ्यातील उपळाई बुद्रुक, अंजनगाव खेलोबा, उपळाई खुर्द या भागांत रात्री विजेच्या कडकडाटासह पाऊस झाला. त्या वेळी अंगावर वीज पडल्याने गणेश सलग यांच्या दोन जर्सी गाई जागेवरच मृत पावल्या. त्याशिवाय उत्तर सोलापुरातील तिरेहे, हिरज, कोंडी, कारंबा भागात हलका पाऊस झाला.

बार्शी तालुक्यातील पानगाव परिसरात वादळी वारे आणि विजांच्या कडकडाटासह जोरदार पाऊस झाला. याचा आंबा फळांसह इतर फळबागांना मोठा फटाका बसला. त्याशिवाय काटेगाव येथेही विजेच्या कडकडाटासह पाऊस झाला.

येथील इसार मुबारक पटेल यांच्या शेतात वीज अंगावर पडल्याने बैल दगावला. करमाळा तालुक्यातील पोथरे येथे पावसाने हजेरी लावली. या भागात उन्हाळी कांद्याचे नुकसान झाले. मोहोळ तालुक्यातील नरखेड, देगाव, वाळूज भागात झालेल्या पावसाने आंबा, कलिंगड, द्राक्ष, खरबुजाचे नुकसान झाले.

मंगळवेढ्यात घरावरील पत्रे उडाले

मंगळवेढा तालुक्यातील डिकसळ, येड्राव, भाळवणी येथे वादळी वाऱ्यामुळे घरावरील पत्रे उडून गेले. पत्र्यावर ठेवलेला दगड लागल्याने भाळवणीतील कामाजी अनिल माने हा सात वर्षीय मुलगा जखमी झाला.

डिकसळमध्ये नऊ घरांवरील पत्रे उडाले, तर पाच शेतकऱ्यांच्या आंबा बागांचे नुकसान झाले. त्याशिवाय तीन ठिकाणी कडब्याच्या गंज्या उडून गेल्या. या घटनेनंतर तहसीलदार मदन जाधव यांनी प्रत्यक्ष घटनास्थळी जाऊन पाहणी केली. तसेच नुकसानग्रस्तांच्या घरांचे पंचनामे करण्याचे आदेश दिले.