Unauthorized seed stock : तळोधी येथे १८ लाखांचा अनधिकृत बियाणे साठा जप्त

Chandrapur News : कृषी विभागाच्या भरारी पथकाने तळोधीत एका पीकअपमधून ७५९ किलो अनधिकृत बियाणे साठा जप्त केला.

जप्त करण्यात आलेल्या बियाण्यांची किमत १८ लाख ९७ हजार रुपये आहे. जिल्हा अधीक्षक कृषी अधिकाऱ्यांनी भरारी पथकाला दम दिल्यानंतर कारवाईला वेग आला असून, या महिन्यातील ही तिसरी कारवाई आहे.

नागपूर-चंद्रपूर मार्गावर असलेल्या तळोधी येथे एका वाहनातून एचटीबीटी बियाण्यांचा साठा येत असल्याची माहिती पोलिसांना मिळाली होती. याच माहितीच्या आधारे पोलिसांनी या मार्गावर नाकाबंदी केली.

नागभीडकडून सिंदेवाहीकडे जात असलेल्या एमएच ३३ टी २०७१ या क्रमांकाच्या पीकअपवर पोलिसांना संशय आला. त्यांनी हे वाहन अडवून तपासणी केली असता त्यात अनधिकृत बियाण्यांचे १५ पोते आढळून आले.

७५९ किलो असलेल्या बियाण्यांची किमत १८ लाख ९७ हजार रुपये आहे. पोलिसांनी हा साठा जप्त करून कृषी विभागाला माहिती दिली. माहिती मिळताच भरारी पथक दाखल झाले. या प्रकरणी प्रकाश शिवदास वन्नेवार, रेणुका बाबू यादलापल्ली यांच्यावर गुन्हे दाखल करण्यात आले.

तेलंगणा सीमेला लागून असलेल्या गोंडपिंपरी तालुक्यातही मोठ्या प्रमाणावर बीटी तस्कर सक्रिय झाले आहेत. अनेक ठिकाणी अनधिकृत बीटीची विक्री सुरू आहे. याच माहितीच्या आधारे कृषी विभागाचे भरारी पथक दोन दिवसांपासून गोंडपिंपरी तळ ठोकून होते. त्यांनी हिवरा, सकमूर, भंगाराम तळोधी, धाबा येथे अनेकांच्या घरांची झाडाझडती घेतली.

धाबा येथे तेलंगणातील कोटेश्वरराव चिलकुरी हा किरायाने राहत होता. त्याच्या घरी चोरीचा बीटीचा साठा असल्याची माहिती मिळताच भरारी पथक धाब्यात पोहोचले. त्यांनी घराची तपासणी केली. त्याच्या घरातही बीटीचा साठा आढळून आला. त्याची किंमत ४२ हजार रुपये आहे.

झाडाझडतीनंतर कारवाई

खरीप हंगामातील ही तिसरी कारवाई आहे. जिल्हा अधीक्षक कृषी अधिकारी शंकर तोटावार यांनी काही दिवसांपूर्वीच भरारी पथकाची बैठक घेतली. हंगामात केवळ एकच कारवाई केल्यावरून त्यांनी पथकातील अधिकारी, कर्मचाऱ्यांना चांगलेच सुनावले होते. त्यानंतर भरारी पथक सक्रिय झाले.

दोन दिवसांत मोठा साठा पथकाने जप्त केला. ही कारवाई विभागीय कृषी संचालक, जिल्हा अधीक्षक कृषी अधिकारी तोटावार यांच्या मार्गदर्शनात कृषी विकास अधिकारी राजपूत, जिल्हा गुण नियंत्रण निरीक्षक बोढे, मोहीम अधिकारी कटरे यांनी केली.