Agriculture Irrigation : पालखेडला दोन आवर्तने द्या; अन्यथा मंत्रालयासमोर आत्मदहन करू

Nashik News : पालखेड कालवा निर्मिती येवला तालुका कायम दुष्काळी म्हणून झाली आहे. तर यंदा तालुक्यात पुरेशा पावसाअभावी खरीप पूर्णपणे हातचा गेला आहे. अशा परिस्थितीत पालखेड धरण समूहातील सर्वच धरणे १०० भरलेली असल्याने तालुक्यातील शेतकऱ्यांच्या भल्यासाठी रब्बी पिकांसाठी १५ नोहेंबरपासून दोन आवर्तने सोडण्यात यावी,

अशी मागणी येवला तालुका प्रहार शेतकरी संघटनेने केली. पाणी न सोडल्यास मंत्रालयासमोर आत्मदहन करू, असा इशारा देण्यात आला आहे. त्यामुळे पालखेड कालव्याच्या पाण्यासाठी ‘प्रहार’ पुन्हा आक्रमक झाली आहे.

येवला तालुका प्रहार शेतकरी संघटनेच्या वतीने जलसंपदा विभागाचे अधीक्षक अभियंता, मुख्यमंत्री, जलसंपदामंत्री, पालकमंत्री, जिल्हाधिकारी, कार्यकारी अभियंता पालखेड डावा कालवा विभाग यांना पत्राद्वारे निवेदन देण्यात आले आहे.

मध्यंतरी पडलेल्या अल्प पावसावर परिसरातील शेतकऱ्यांनी कांदा लागवड केलेली आहे. मात्र सध्या विहिरी कोरड्या असल्याने पाणी लवकर सोडल्यास कांदा पीक हातात येऊन शेतकऱ्याच्या हाती दोन पैसे मिळतील. पूर्वानुभव बघता नुसता तालुका दुष्काळी जाहीर झाल्याने शेतकऱ्यांच्या हातात काहीच पडणार नाही. मात्र दोन आवर्तने दिल्यास बऱ्यापैकी शेतकऱ्यांना दिलासा भेटेल असे सांगण्यात आले आहे.

वास्तविक करंजवन, पालखेड धरणांतील १ नोहेंबर रोजीचा पाणीसाठा ५,६५० दशलक्ष घनफूट व वाघाड धरणातील ४० टक्के पकडून तिन्ही धरणांतील जलसाठा ६,८५० दशलक्ष घनफूट उपलब्ध असल्याने पाहिल्या ३० दिवसांच्या अवर्तनासाठी १,८०० दशलक्ष घनफुट व दुसऱ्या २५ दिवसांच्या अवर्तनासाठी १,४०० दशलक्ष घनफूट पाण्याची गरज लागणार आहे.

उपलब्ध पाणीसाठ्यात प्रासंगिक आरक्षण वजा जाता हे सहज शक्य असल्याने येवला तालुक्यातील दुष्काळी शेतकऱ्यांना दिलासा देण्यासाठी रब्बीचे १५ नोहेंबर ते १५ डिसेंबर पाहिले, तर १ जानेवारी ते २५ जानेवारी दुसरे आवर्तन देण्याची मागणी केली आहे. या वेळी तालुकाध्यक्ष हरिभाऊ महाजन, संघटक किरण चरमळ, उपाध्यक्ष रामभाऊ नाईकवाडे, शिवाजी खापरे, विलास उराडे, अशोक खापरे, दीपक सोनवणे आदी शेतकरी उपस्थित होते.