Crop Damage Compensation : यवतमाळ जिल्ह्यातील तीस हजार शेतकरी भरपाईच्या प्रतीक्षा

Yavatmal News : गेल्या वर्षी जुलै-ऑगस्टमध्ये महागाव तालुक्‍यात अतिवृष्टीने दाणादाण उडाली होती. या नुकसानीसाठी ३० हजार शेतकऱ्यांकरिता तीस कोटींचा निधी मंजूर करण्यात आला. मात्र तो अद्यापही खात्यात जमा झाला नसल्याने शेतकऱ्यांची प्रतीक्षा कायम असून, प्रशासनिक कारभारावर नाराजी व्यक्‍त केली जात आहे.

गेल्या खरीप हंगामात जुलै- ऑगस्ट महिन्यांत जिल्ह्यातील बहुतांश तालुक्‍यांमध्ये सर्वदूर पावसाने हजेरी लावली होती. त्याचा फटका महागाव तालुक्‍यालाही बसला. अतिवृष्टीच्या परिणामी नद्या-नाले तुडुंब झाल्याने हे पाणी शेतात शिरत अनेकांचे शिवार खरडून गेले. जमीन नापेर झाल्याने शेतकऱ्यांसमोरील संकट आणखीच गडद झाले.

अशा स्थितीत शासनाकडून तत्काळ आर्थिक मदतीच्या माध्यमातून दिलासा मिळणे अपेक्षित होते. परंतु शासनाने महागाव तालुक्‍यातील ३० हजार शेतकऱ्यांसाठी जाहीर केलेली तीस कोटींची मदत अद्यापही त्यांच्या खात्यात जमा करण्यात आली नाही. त्यामुळे शेतकऱ्यांमध्ये तीव्र असंतोष खदखदत आहे.

विशेष म्हणजे खाते बदल, नावातील बदल यामुळे पैशाची अफरातफर होण्याची शक्‍यता पाहता शासनस्तरावरून आधार प्रमाणीकरण करण्याच्या सूचना देण्यात आल्या. त्याकरिता थंब घेण्याची प्रक्रिया राबविली गेली. परंतु अनेकांचे थंब लागत नसल्याने सेतू केंद्रावर रात्री १२ वाजेपर्यंत रांगा लागत होत्या.

महागाव तालुक्‍यातील तीस हजारांवर शेतकऱ्यांपैकी २० हजार ९७२ शेतकऱ्यांची ई-केवायसी प्रक्रिया झाली आहे. १२ हजार ३७० शेतकऱ्यांचे खाते अजूनही केवायसी अपडेट झालेले नाही. सर्व्हेरची गती अतिशय मंद असल्याची ओरड केवायसी अपडेट करणाऱ्या केंद्र संचालकांद्वारे होत आहे.

यंत्रणाच सदोष

थंब प्रमाणीकरण केल्यानंतरच आधार कार्ड लिंक असणाऱ्या शेतकऱ्यांच्या खात्यात नुकसान भरपाईची रक्‍कम ७२ तासांत जमा होणार होती. परंतु ती अद्यापही झाली नसल्याने शेतकरी हवालदिल झाले आहेत.