Water Bill Recovery : ऊस बिलातून पाणीपट्टीची कपात होणार नाही

Pune News : दत्तात्रयनगर, पारगाव (ता. आंबेगाव) येथील भीमाशंकर सहकारी साखर कारखान्यामार्फत शेतकऱ्यांच्या ऊस बिलातून पाटबंधारे विभागामार्फत कपात केली जाणारी पाणीपट्टीची रक्कम कपात न करण्याचा निर्णय घेतला असल्याची माहिती अध्यक्ष बाळासाहेब बेंडे यांनी दिली.

बाळासाहेब बेंडे म्हणाले, की वार्षिक सर्वसाधारण सभेतील निर्णयानुसार मागील तीन वर्षांपासून पाटबंधारे विभागाकडून कपात करण्यात येणार्या पाणीपट्टीची रक्कम शेतकऱ्यांच्या ऊस बिलातून कपात करून पाटबंधारे विभागाला वसूल करून देण्यात येत होती.

तथापी चालू वर्षी पाटबंधारे विभागाकडून पाणीपट्टीच्या दरात वाढ करण्यात आली आहे. त्याप्रमाणे शेतकऱ्यांच्या पहिल्या पंधरवडा बिलातून नेहमीप्रमाणे पाणीपट्टी वसूल करण्यात आली आहे.

शेतकऱ्यांच्या वाढीव पाणीपट्टी वसुलीबाबत तक्रर आल्यानंतर वाढीव पाणीपट्टीबाबत माहिती घेऊन राज्याचे सहकारमंत्री व कारखान्याचे संस्थापक-संचालक दिलीप वळसे पाटील यांच्या निदर्शनास पाणीपट्टीमध्ये झालेली वाढ दाखवून देण्यात आली.

त्यावर वळसे पाटील यांनी त्वरित निर्णय घेऊन ही पाणीपट्टी कपात न करण्याचा निर्णय घेतला व त्याप्रमाणे कारखाना प्रशासनास सूचना करण्यात आल्या आहेत. वळसे पाटील हे आजपर्यंत नेहमीच शेतकऱ्यांच्या हिताचे निर्णय घेत आले असून शेतकरी हिताचेच निर्णय घेत असतात. त्यानुसार कोणाच्याही इशाऱ्यानुसार पाणीपट्टी कपात न करण्याचा निर्णय घेतला नसून शेतकऱ्यांच्या हितासाठी हा निर्णय घेऊन त्यानुसार कारखाना प्रशासनास सूचना दिल्या आहेत.