Jalgaon News : खानदेशात हरभऱ्याची पेरणी यंदा ऑक्टोबरमध्ये सुरू होणार आहे. क्षेत्र यंदा सुमारे १० हजार हेक्टरने वाढून सव्वादोन लाख हेक्टरवर पेरणी होईल, अशी माहिती आहे. यंदा ओलावा चांगला आहे. तसेच पाऊसमान चांगले राहिल्याने जलसाठे बऱ्यापैकी आहेत. यामुळे पेरणीवर परिणाम होणार नाही, अशी माहिती आहे.
पेरणीत मोठी वाढही होणार नाही. कारण सर्वच शेतकऱ्यांकडे मुबलक जलसाठे नाहीत. अनेकांनी मका, ज्वारी ऐवजी हरभऱ्याच्या पेरणीचे नियोजन केले आहे. खानदेशात मागील तीन वर्षे रब्बीची चार लाख हेक्टरवर पेरणी झाली आहे. त्यात फक्त मागील हंगामात पेरणी कमी पावसाने घटली होती. परंतु मागील वेळेसही हरभऱ्याची सर्वाधिक एक लाख ९० हजार हेक्टरवर पेरणी झाली हरोती.
यंदा मात्र पेरणीत आणखी काहीशी वाढ होईल, असे मानले जात आहे. पाणी मुबलक असले तरी यंदा हरभऱ्याचे क्षेत्र फारसे वाढणार नाही, असाही अंदाज आहे. कारण अनेक शेतकरी परंपरेनुसार हरभरा पेरणीचे नियोजन करतात. हरभरा कमी खर्च व कमी पाण्यात येणारे पीक आहे. यंदा पेरणीत किंचित किंवा १० ते १२ हजार हेक्टरने वाढ होईल, असे सध्या दिसत आहे.
काही शेतकरी पुढे काबुली किंवा डॉलर (मॅक्सिको) हरभऱ्याची पेरणी करतील. यामुळे क्षेत्रात पुढे वाढही दिसू शकते. ही पेरणी धुळ्यातील शिरपूर, जळगावमधील चोपडा, यावल भागांत होईल. ती तीन ते साडेतीन हजार हेक्टरवर होईल, असे सांगितले जात आहे. कोरडवाहू हरभऱ्याची पेरणी यंदा बऱ्यापैकी असणाार आहे. ही पेरणी करण्यासाठी अनेकांना वेळ आहे.
ओलावाही आहे. सोयाबीनचे पीक आल्यानंतर त्यात हरभरा पेरणी करता येईल. या कालावधीतही ओलावा राहणार आहे. पूर्वमशागत करताना वेळ लागणार आहे, पण त्याचे नियोजन शेतकऱ्यांनी केले आहे. काही कोरडवाहू शेतीधारकांनी नजीकच्या शेतकऱ्यांकडून पाणी घेण्याचे नियोजनही केले आहे. एक वेळेस सिंचन केल्यास पीक जोमात येते, असे शेतकरी मानतात.
हरभरा पेरणीस खानदेशात जळगावमधील रावेर, यावल, चोपडा, धुळ्यातील शिरपूर, नंदुरबारमधील शहादा, तळोदा भागांतील शेतकरी पसंती देतात. मका पीक खर्चिक बनले आहे. त्यास पाणी व फवारण्या अधिक लागतात.
तसेच अमेरिकन लष्करी अळीचेही संकट असते. यामुळे अनेकांनी मका पिकाऐवजी हरभऱ्याची पेरणी करण्याचे नियोजन केले आहे. तसेच खानदेशात केळी, पपई आदी पिकांसाठी हरभरा पिकांचे बेवड चांगले मानले जाते. यातूनही अनेकांनी हरभरा पेरणीचे नियोजन केले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.