Farmer Union Protest : सरसकट आले खरेदीसाठी ‘स्वाभिमानी’चे आंदोलन

Satara News : आले उत्पादकांची लूट थांबवावी, या मागणीसाठी पुणे बाजार समितीवर स्वाभिमानी शेतकरी संघटनेच्या वतीने धडक मारण्यात आली. या वेळी स्वाभिमानी कार्यकर्त्यांनी चुकीच्या पद्धतीने सुरू असलेली आल्याची खरेदी-विक्री बंद पाडून आंदोलन केले.

सातारा, छत्रपती संभाजीनगर, सांगली जिल्ह्यात सरसकट आले खरेदीसाठी स्वाभिमानी शेतकरी संघटनेचे आंदोलन सुरू आहे. यंदा आल्याचे दर वाढल्यानंतर खरेदीमध्ये जुने आणि नवे आले पद्धत सुरू करून शेतकऱ्यांची लूट सुरू केली आहे. या विरोधात सातारा, सांगली जिल्ह्यांत स्वाभिमानी शेतकरी संघटनेने जुने आणि नवे आले अशी प्रतवारी न करता सरसकट खरेदीसाठी तीव्र आंदोलन उभे केले आहे.

पावसाळी अधिवेशनात सरसकट आले खरेदी करण्याचा निर्णय सभागृहात जाहीर केला गेला. मात्र तरीही काही व्यापारी आल्याच्या खोडवा पिकाच्या नवीन मालाचा वेगळा दर आणि जुन्या मालाचा वेगळा दर करून शेतकऱ्यांना नाडत आहेत. व्यापाऱ्यांना धडा शिकवण्यासाठी पुणे बाजार समितीवर धडक देण्यात आली.

या वेळेला प्रतवारी केलेले दोन टन आले ‘स्वाभिमानी’ने जप्त केले. या वेळी युवा प्रदेशाध्यक्ष अमरसिंह कदम, बाबासाहेब झगडे, राजकुमार शिंदे, राहुल घोळवे, औदुंबर आव्हाड, राजू शेळके, वैभव पाटील, विकी इनामदार, दिनेश बर्गे, अमर बर्गे, प्रवीण बर्गे, तानाजी देशमुख, दत्तू घार्गे आदी उपस्थित होते.