Market Committee Election : बाजार समिती निवडणुकीतून काँग्रेसच्या जगन्नाथ काळे यांचा अर्ज वैध

Chhatrapati Sambhajinagar : छत्रपती संभाजीनगर बाजार समितीच्या निवडणुकीत काँग्रेसचे नेते तथा माजी प्रशासक जगन्नाथ काळे यांचा उमेदवारी अर्ज पणन संचालक मोहन निंबाळकर यांनी सोमवारी (ता. १७) वैध ठरविला. काळे यांचा अर्ज जिल्हा उपनिबंधक मुकेश बारहाते यांनी अपात्र ठरवला होता. आता या निर्णयामुळे काळे यांना दिलासा मिळाला आहे.

यासंदर्भात अधिक बाजार समिती निवडणुकीत जगन्नाथ काळे यांनी सहकारी संस्था मतदार संघातून उमेदवारी अर्ज दाखल केला होता. त्यांचे बंधू भाऊसाहेब काळे हे बाजार समितीचे अनुज्ञप्तीधारक असून बाजार समिती परिसरात ३५, ३६ व ३७ क्रमांकाचे गाळे मेहेर सीड्सच्या नावावर आहेत, त्यांचे मालक हे जगन्नाथ काळे आहेत.

शिवाय ते जिल्हा व्यापारी महासंघाचे अध्यक्षही असल्याने त्यांचा शेतकऱ्यांसाठी असलेल्या सहकारी संस्था मतदार संघातील अर्ज अवैध ठरवावा, असा आक्षेप माजी सभापती राधाकिसन पठाडे यांनी नोंदविला होता.

त्यावर सुनावणी घेत निवडणूक अधिकारी तथा जिल्हा उपनिबंधक मुकेश बारहाते यांनी ६ एप्रिल रोजी जगन्नाथ काळे यांचा अर्ज अपात्र ठरवला. त्या विरोधात काळेंनी पणन संचालकाकडे पठाडेंविरोधात दोन अपील सादर केली होती. त्यावर १३ एप्रिल रोजी सुनावणी झाली.

त्यात पठाडे यांच्या बाजूने वकिलांनी म्हणणे मांडण्यासाठी वेळ वाढवून मागितला होता. त्यानुसार पणन संचालकांनी सोमवारी (ता. १७) सुनावणी करण्याचा निर्णय घेत दोन्ही बाजूंचे म्हणणे ऐकून घेत काळे यांचा अर्ज वैध ठरवत जिल्हा उपनिबंधकांचा आदेश रद्दबातल ठरवला.

काळेंच्या नावे नाहीत परवाने

जगन्नाथ काळे यांनी या निर्णयास ॲड. प्रसाद जरारे यांच्यामार्फत आव्हान दिले होते. यावर सोमवारी झालेल्या सुनावणीत जगन्नाथ काळे यांच्या नावाने बाजार समितीने दुकानाचा एकही परवाना नाही. भाऊसाहेब काळे यांच्या नावावर परवाने आहेत.

मात्र, जगन्नाथ काळे आणि भाऊसाहेब काळे हे एकत्र कुटुंबातील असल्याचा कोणताही पुरावा बाजार समितीने दिला नाही. जगन्नाथ आणि भाऊसाहेब हे विभक्त कुटुंबात राहत असल्याचा पुरावा अपिलकर्त्यानी सादर केला. त्यामुळे निवडणूक निर्णय अधिकाऱ्यांचा आदेश फेटाळण्यात येत असल्याचे पणन संचालकांनी म्हटले आहे.