Takari Scheme : ताकारी योजनेचे पाणी तासगाव तालुक्यात

Sangli News : ताकारी लाभक्षेत्रातील पाणी मागणी विचारात घेऊन पाटबंधारे विभागाने ‘ताकारी’चे यावर्षीचे तिसरे व रब्बी हंगामातील दुसरे आवर्तन २२ जानेवारीला सुरू झाले होते. हे पाणी कडेगाव आणि खानापूर तालुक्यांची तहान भागवून सध्या तासगाव तालुक्यातील लोढे गावाजवळून वाहत आहे. योजनेवर अवलंबून असणाऱ्या संपूर्ण क्षेत्राला पाणी पोहोचल्याशिवाय आवर्तन बंद होणार नाही, अशी खात्री कार्यकारी अभियंता राजन डवरी यांनी दिली.

ताकारी योजनेचे यावर्षीचे पहिले आवर्तन खरीप हंगामात दिले होते. त्यानंतर रब्बी हंगामातील पहिले व यावर्षीचे दुसरे आवर्तन ५ नोव्हेंबरला सुरू करण्यात आले होते. ते आवर्तन सुरू झाल्यानंतर अनेक वेळा तांत्रिक बिघाड व अवकाळी पावसामुळे योजना बंद ठेवावी लागली होती.

परिणामी ३५ दिवस चालणारे आवर्तन तब्बल ५० दिवस चालवावे लागले होते. त्या आवर्तनासाठी कृष्णा नदीतून एक पॉइंट एक टीएमसी पाणी उचलण्यात आले होते. या माध्यमातून ताकारी योजनेच्या सर्व लाभक्षेत्राला पुरेसे पाणी उपलब्ध झाले होते. मिरज तालुक्यातील सोनीपर्यंत (१४४ कि.मी.) सर्व लाभक्षेत्राला पाणी दिल्यानंतर ते आवर्तन बंद केले होते.

ताकारी योजनेच्या वाट्याचे यावर्षीचे ३.६ टीएमसी पाणी अद्याप उचलणे बाकी आहे. सध्या उन्हाचा कडाका वाढल्याने पाणी मागणी वाढली आहे. शिवाय मुख्य कालव्याच्या अंतराचा मोठा टप्पा पार करताना पाटबंधारेला कसरत करावी लागत आहे. यासाठी टप्पा १ व २ वरील ११ पंपाचे पाणी मुख्य कालव्यात सोडले आहे.

टप्पा ३ व ४ वरील प्रत्येकी केवळ २ पंप सुरू असून त्याद्वारे पाणी सोनहिरा खोऱ्यासह तडसरपर्यंत पोहोचविण्याचे नेहमीचे नियोजन आहे. ताकारी योजना आजतागायत सक्षमपणे कार्यरत असून, या योजनेची आवर्तनेही विहीत वेळेत मिळतात. पाणीपट्टी आकारणी व वसुली नियमितपणे होत आहे. यामुळे वीजबिल थकबाकीचा प्रश्न उद्भवत नाही.