Kisan Rail News: शेतकऱ्यांच्या हितासाठी किसान रेल पुन्हा सुरू करा, अन्यथा ७ ऑक्टोबरला ठिय्या आंदोलन; स्वतंत्र भारत पक्षाचा इशारा

Pune News : राज्याच्या अहमदनगर, पुणे, सोलापूर जिल्ह्यात फळं, फुलं आणि भाजीपाला शेतीचे प्रमाण अधिक आहे. मात्र येथे किसान रेल बंद असून शेतकऱ्यांचे नुकसान होत आहे. यामुळे शेतकऱ्यांचे नुकसान टाळण्यासाठी किसान रेल पुन्हा सुरू करावी, अशी मागणी स्वतंत्र भारत पक्षाने केली आहे. याच मागणीसाठी अहमदनगर जिल्हाधिकारी कार्यालयासमोर ७ ऑक्टबर रोजी ठिय्या आंदोलन केले जाईल, असा इशाराही यावेळी स्वतंत्र भारत पक्षाचे राष्ट्रीय अध्यक्ष अनिल घनवट यांनी दिली आहे.

राज्याच्या अहमदनगर, पुणे, सोलापूर जिल्ह्यातील शेतकरी उत्तर भारतात व पूर्वेकडच्या राज्यांमध्ये माल पाठवतात. पण आता किसान रेल बंद असल्याने नुकसान होत आहे. ते नुकसान थांबवावे, असे निवेदन स्वतंत्र भारत पक्ष, जन संसद संघटना व पीपल्स हेल्पलाईन यांनी दिले आहे. तर या निवेदनातून किसान रेल पुन्हा सुरू करावी, अशीही मागणी करण्यात आली होती.

तसेच सध्या किसान रेल बंद असल्याने शेतकऱ्यांना त्यांचा माल जलद प्रवासी गाड्यांमधून पाठवावा लागत आहे. या गाड्यांमध्ये फक्त अर्धाच डब्बा पार्सलसाठी असतो. यातही स्टील, लोखंड, गाड्यांचे सुटे भाग भरलेले असतात. यामुळे शेतकऱ्यांना त्यांचा माल भरता येत नाही. तर भरलाच तर तो खराब होतो. तसेच माल चाढवणारे ठेकेदार शेतकऱ्यांकडून मालाची चढ उतार करण्यासाठी अव्वाचे सव्वा हमाली घेतात. यातूनही शेतकऱ्यांची पिळवणूक होते, असे घनवट यांनी म्हटले आहे.

त्यामुळे रेल्वे मंत्रालयाने बंद केलेल्या किसान रेल्वे पुन्हा सुरू कराव्यात. खरच गरज आहे अशा ठिकाणी किसान रेल सुरू करावी, अशी मागणी देखील घनवट यांनी केली आहे. तर केंद्र सरकारने शेतकऱ्यांचा हिताचा विचार करावा यासाठी अहमदनगर कार्यालयासमोर एक दिवसीय ठिय्या आंदोलन केले जाणार आहे. हे आंदोलन ७ ऑक्टोंबर रोजी केले जाणार असल्याचे घनवट यांनी म्हटले आहे.