Solapur ZP : कर न भरल्यास लोकअदालतीत खटला

Solapur News : जिल्ह्यातील एक हजार १९ ग्रामपंचायतींना यंदा पाणीपट्टी व घरपट्टीतून ८० कोटी ९७ लाख रुपयांचे उत्पन्न अपेक्षित आहे. अद्याप ४३ कोटी २३ लाख रुपयांची वसुली झालेली नाही.

मिळकतदारांनी ग्रामपंचायतीचा कर वेळेत भरावा, अन्यथा थकबाकीदारांवर खटला दाखल करून लोकअदालतीत पाठविण्याची किंवा मुंबई ग्रामपंचायत अधिनियमानुसार त्याच्या मालमत्तेवर बोजा चढविला जाऊ शकतो.

या आर्थिक वर्षात जिल्ह्यातील सर्व ग्रामपंचायतींनी पाणीपट्टीचे २७ कोटी ९३ लाख रुपये आणि घरपट्टीचे ५३ कोटी चार लाख वसूल करणे अपेक्षित आहे. परंतु, कर वसुलीत करमाळा, माढा, मंगळवेढा हे तालुके पिछाडीवर आहेत.

संबंधित तालुक्यातील ग्रामसेवकांना त्यासंबंधीच्या सक्त सूचना उपमुख्य कार्यकारी अधिकाऱ्यांना दिल्या आहेत. मागच्या महिन्यापर्यंत पाणीपट्टीतून १३ कोटी १८ लाख रुपये तर घरपट्टीतून २४ कोटी ५६ लाखांची वसुली झाली आहे. अद्याप ६५ टक्के वसुली राहिलेली आहे.

आता थकबाकीदारांना नोटीस (समन्स) बजावण्याची कार्यवाही सुरू आहे. जे मिळकतदार ग्रामपंचायतीची थकबाकी भरणार नाही, त्याला लोकअदालतीत पाठवून वसुलीची कार्यवाही केली जाऊ शकते.

दुसरीकडे सातत्याने थकबाकीत असलेल्या मिळकतदाराच्या चल-अचल मालमत्तेवर बोजा चढविला जाईल. त्यामुळे या कारवाईपासून दूर राहायचे असल्यास मिळकतदारांनी त्यांच्याकडील ग्रामपंचायतीचा कर वेळेत भरून सहकार्य करावे, असे आवाहन देखील करण्यात आले आहे.

करासाठी दाखल्यासाठी अडवणूक नको

एखाद्या मिळकतदाराने पाणीपट्टी किंवा घरपट्टी भरलेली नाही म्हणून त्याला शासकीय योजनांचा लाभ न देणे, उतारा किंवा इतर दाखला न देणे, असे कोणत्याही नियमात नाही. नागरिकांनी दाखल्यासाठी अर्ज केल्यानंतर संबंधित ग्रामविकास अधिकाऱ्यांनी दाखला देणे बंधनकारक आहे. तरीपण, आपल्या गावाच्या विकासाला हातभार लागावा, यासाठी कर वेळेत भरावा, असे अपेक्षित आहे. थकबाकीदारांवर कायदेशीर कारवाई देखील होऊ शकते.