Swabhimani Shetkari Sanghatana Protest: स्वाभिमानी शेतकरी संघटनेचे संस्थापक राजू शेट्टी यांच्या नेतृत्त्वाखाली सुरु असलेले ऊस उत्पादक शेतकऱ्यांचे पुणे- बंगळूर महामार्गावरील ठिय्या आंदोलन स्थगित करण्यात आले आहे. 'आता आम्ही उद्यापासून कारखान्यातून बाहेर पडणारी साखर अडवू आणि कारखान्यांना ऊस पुरवठा बंद करण्याचे आंदोलन हाती घेणार आहोत, असे शेट्टी यांनी जाहीर केले..साखरेचे किमान विक्री मुल्य (एमएसपी), इथेनॉल दरात वाढ तसेच ऊस उत्पादक शेतकऱ्यांना अनुदान देण्याच्या मागणीसाठी कोगनोळी टोलनाक्यावर सलग ३२ तास हे आंदोलन सुरु होते. यामुळे प्रचंड मोठी वाहतूक कोंडी झाली. प्रवाशांची होणारी कोंडी लक्षात घेऊन शेतकऱ्यांनी महामार्गावरील ठिय्या आंदोलन स्थगित केले. .'कारखान्यांचे गाळप बंद पाडू'ऊस आंदोलनकर्त्यांची विनंती धुडकावून कारखाने सुरु करण्याचा प्रयत्न केला जात आहे. त्या कारखान्याचे गाळप पुढच्या तीन दिवसांमध्ये बंद पाडू. त्यानंतर पुन्हा महाराष्ट्र आणि कर्नाटकातील शेतकरी संघटनांनी हुबळीत एकत्रित येण्याचा निर्णय घेतला असल्याचे शेट्टींनी सांगितले..Sugarcane Protest : ‘स्वाभिमानी’ने ऊसवाहतूक रोखली.ते पुढे म्हणाले की, हे आंदोलन सुरु होण्यापूर्वी महाराष्ट्रातील प्रमुख कारखानदारांनी मी स्वतः भेटून विनंती केली होती की, तुम्हाला गेल्या सात वर्षांत साखरेची एमएसपी वाढवून घेता आलेली नाही. तेव्हा आम्ही शेतकऱ्यांनी एमएसपी वाढवून घेण्याचा निर्णय घेतला आहे. आमचे हे केंद्र सरकारच्या विरोधातील आंदोलन आहे. या आंदोलनाला बळ देण्यासाठी काही कालावधीकरिता कारखाने बंद ठेवा. कारखाने बंद ठेवल्यामुळे तुमचा ऊस सुरक्षित राहील. नोव्हेंबरमध्ये कारखाने सुरु केल्यास रिकव्हरी वाढून कारखाने आणि शेतकऱ्यांचाही फायदा होईल. कारण उसाचे वजन वाढेल. तीन महिन्यांच्या पुढे कोणताही कारखाना चालणार नाही. ही आमची भूमिका अनेकांना पटली. पण काही कारखानदारांवर सरकारने दबाव आणला. कारण सरकारला हे आंदोलन मोडीत काढून कोणत्याही परिस्थितीत साखर बाजारात आणायची आहे. अन्यथा दिवाळी, दसऱ्याच्या तोंडावर बाजारात साखरेची टंचाई निर्माण होऊन भाव वाढण्याची शक्यता आहे. म्हणून सरकारने हा कुटिल डाव खेळला. पण हा डाव हाणून पाडायच्या दृष्टीने आम्ही उद्यापासून कारखाने बंद पाडण्याचे आंदोलन करु, असा इशारा त्यांनी दिला..Sugarcane Farmers Protest: पुणे- बंगळूर महामार्गावर ऊस उत्पादक शेतकऱ्यांचा ठिय्या, राजू शेट्टींच्या नेतृत्वाखाली बेमुदत धरणे आंदोलन.आम्ही साखरेच्या प्रति किलो ५० रुपये एमएसपीची मागणी करत आहेत. पण एवढी एमएसपी सरकार का देत नाही? असा सवालही त्यांनी केला. साखरेची एमएसपी वाढली तर कारखानदारांचा फायदा होईल. तरीसुद्धा ते ऐकणार नसतील तर साखर आम्ही गोरगरिबांना वाटून टाकू, असेही त्यांनी म्हटले. .हत्तरगी टोल नाका येथून पदयात्रेला सुरुवातमहामार्गावरील आंदोलन स्थगित केल्यानंतर कर्नाटक राज्य रयत संघाचे प्रमुख चुन्नाप्पा पुजारी यांनी बेळगाव जवळील हत्तरगी टोल नाका येथून पदयात्रेला सुरुवात केली आहे. ही पदयात्रा केंद्रीय मंत्री प्रल्हाद जोशी यांच्या हुबळी येथील निवासस्थानावर धडकणार आहे. याच आंदोलनाचा दुसरा टप्पा म्हणून महाराष्ट्रातील साखर कारखानदारांविरोधात राजू शेट्टी यांनी मोर्चा वळविला केला आहे. सातारा आणि सांगलीमधील काही कारखानदारांनी घाईघाईने गळीत हंगाम सुरू केल्याबद्दल त्यांनी तीव्र संताप व्यक्त केला..दुष्काळामुळे शेतकरी होरपळला, सामंजस्याची भूमिका घ्यावी- फडणवीसांचे आवाहनऊस उत्पादक शेतकऱ्यांच्या आंदोलनाच्या पार्श्वभूमीवर मुख्यमंत्री देवेंद्र फडणवीस यांनी सरकारची भूमिका स्पष्ट केली. शेतकरी दुष्काळामुळे होरपळला असून सगळ्यांनी सामंजस्याची भूमिका घ्यावी, असे आवाहन त्यांनी केले. हे वर्ष फार अडचणीचे आहे. एकीकडे ऊस कमी आहे. यामुळे साखर कारखान्यांच्या हंगामाचा कालावधी कमी होणार आहे. दुसरीकडे साखर कमी असल्यामुळे हंगाम लवकर सुरु करायचा आहे. त्यासाठी कारखान्यांकडून प्रयत्न सुरु आहेत. मागील सर्व अडचणींमुळे कारखाने काही प्रमाणात अडचणीत आहेत. महाराष्ट्र हे असे एकमेव राज्य आहे; जिथे ९९ टक्क्यांपेक्षा जास्त एफआरपीचे पेमेंट झाले आहे. देशात कुठेही एवढे पेमेंट होत नाही, असा दावा मुख्यमंत्र्यांनी केला..सातत्याने केंद्र सरकारने एफआरपी वाढवलेली आहे. कारखाने अडचणीत असून, ऊसही कमी आहे. अशी परिस्थितीत अधिक अडवणूक न करता लवकरात लवकर कारखाने सुरु झाले पाहिजेत. महाराष्ट्रातील कारखाने बंद ठेवल्यामुळे कर्नाटकातील कारखाने मोठ्या प्रमाणात ऊस घेऊन जातात. यामुळे कारखाने आणि शेतकऱ्यांचे नुकसान होते. कारण आपण एफआरपी चांगली देतो. या अडचणी समजून घ्याव्यात. हे दुष्काळाचे वर्ष आहे. शेतकरी होरपलेला आहे. अशा परिस्थितीत सगळ्यांनी सामंजस्याची भूमिका घेऊन लवकर कारखाने सुरु होतील आणि लवकर उसाचे पैसे मिळतील असा प्रयत्न केला पाहिजे, असे मुख्यमंत्री फडणवीस यांनी म्हटले..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
