Sugarcane FRP : कोल्हापूर पूर्व भागात ऊस तोडणी बंदच

Kolhapur News : ऊसदराचा तिढा अद्याप न मिटल्याने जिल्ह्याच्या पूर्व भागातील ऊस तोडी पूर्णपणे ठप्प राहिल्याचे चित्र शुक्रवारी (ता. १७) होते. पश्चिम भागातील काही कारखान्यांची ऊस तोडणी सुरू होती. शेतकरी संघटनांनी आंदोलन मागे न घेतल्याने ही ऊस तोडणी ही रखडतच सुरू आहे. पूर्व भागातील बहुतांश कारखान्यांचे ऊस तोडणी मजूर बसूनच आहेत.

ऊस तोडणी वेगाने सुरू नसल्याने अनेक कारखानदार चिंतेत आहेत. गुरुवारी (ता.१६) शेतकरी संघटना व कारखान्यांचे प्रतिनिधी यांच्यात जिल्हाधिकारी कार्यालयात बैठक झाल्यानंतर देखील तोडगा निघू शकला नाही. कारखानदारांनीही तातडीने ऊस तोडणी आम्ही सुरू करू, असे भाष्य केलेले नाही. यामुळे ऊस तोडणीचा तिढा कायम राहिल्याचे चित्र दिसले.

संभाव्य नुकसान टाळण्यासाठी कोणत्याही कारखान्याने ऊस तोडणी सुरू केलेली नाही. दोन दिवसांपूर्वी उसाने भरलेल्या बैलगाड्या शिवारातच उलट्या केल्याने ऊस तोडणी कामगारांत भीतीचे वातावरण आहे. परिणामी साखर कारखान्यांनी ही तोडणी कामगारांना ऊस तोडणीसाठी फारसा दबाव टाकला नसल्याचे चित्र होते.