Kolhapur Stromy Rain : कोल्हापूर आणि सांगली जिल्ह्यातील अनेक गावात मंगळवार(ता.२३) रात्री उशिरा मुसळधार पावसाने हजेरी लावली. सांगली जिल्ह्यात गारपीठ झाली तर कोल्हापूर जिल्ह्यात वादळी पावसाने काही ठिकाणी पिकांचे मोठे नुकसान झाले. माळरानावर असलेल्या पिकांना दिलासा मिळाला असला तरी सूर्यफूल शेतीला फटका बसण्याची शक्यता आहे. चंदगड तालुक्यातील काढणीला आलेल्या नाचणी पिकाचे मोठे नुकसान झाले आहे. तर सांगली जिल्ह्यातील आरग गावच्या एका युवकाचा वीज पडून मृत्यू झाला.
सांगली जिल्ह्यात वीज पडून एकाचा मृत्यू
सांगली जिल्ह्याच्या मिरज तालुक्यातील आरग येथील उदय माळी (वय ३३) सायंकाळी शेतात कामानिमित्त गेले होते. यावेळी अचानक सुरू झालेल्या वादळी पावसामध्ये माळी यांच्या अंगावर वीज पडून जागीच मृत्यू झाला. या भागात जोरदार वाऱ्यासह गारांचा पाऊस झाला. तासगाव शहरासह परिसरातील गावांना जोरदार गारपिटीने झोडपले. यावेळी सुमारे ३ इंचापेक्षा मोठ्या आकारांच्या दगडासारख्या गारा पडल्याची माहिती शेतकऱ्यांनी दिली. इतक्या मोठ्या आकाराच्या गारा पहिल्यांदाच या परिसरात पडल्या. गारपीट आणि वादळी वाऱ्यासह अचानक झालेल्या अवकाळी पावसाने नागरिकांची तारांबळ उडाली.
कोल्हापूर जिल्ह्यातील जोतिबा डोंगरावर वादळी वाऱ्यासह अर्धा तास मुसळधार पाऊस झाला. अचानक आलेल्या पावसामुळे भाविक, ग्रामस्थ, दुकानदार, व्यापारी यांची धावपळ उडाली. काही दुकानदारांचे प्रसादाचे साहित्य भिजले. चैत्र यात्रेनंतर हा पहिलाच पाऊस पडला. त्यामुळे यात्रेतील सर्व गुलाल धुवून निघाला. मंदिरात गुलालाचा खच पडलेला होता तो धुवून गेला.
कोल्हापूर जिल्ह्यातील चंदगड, आजरा, गडहिंग्लज, करवीर, शिरोळ हातकणंगले तालुक्यात जोरदार पाऊस झाला. चंदगड तालुक्यातील नाचणी पिकाला फटका बसला तर काजू शेतीला दिलासा मिळाला. तालुक्यात काही ठिकाणी आठवडा बाजार भरला होता त्याठिकाणी शेतकऱ्यांसह व्यापाऱ्यांची तारांबळ उडाली. करवीर तालुक्यात सूर्यफूल शेती जोमात आली आहे परंतु झालेल्या पावसाने काहीसा फटका बसला आहे.
शिरोळ तालुक्यात जोरदार पाऊस
शिरोळ तालुक्यात सायंकाळच्या सुमारास ढगांच्या कडकडाटासह मुसळधार पावसाने हजेरी लावली. मागील पंधरा दिवसांपासून चकवा देणाऱ्या पावसाने मंगळवारी हजेरी लावल्यानंतर नागरिकांसह शेतकरी सुखावला आहे. दुपारी तीननंतर ढगाळ वातावरण निर्माण झाले. सायंकाळी साडेसहा वाजता सुरू झालेल्या पावसानंतर वीज परवठा खंडित करण्यात आला होता.
भुदरगड तालुक्यात पाऊस
भुदरगड तालुक्यातील पिंपळगाव परिसरात गारांसह जोरदार पाऊस झाला. तालुक्यातील पिंपळगावसह, दिंडेवाडी, मुरुक्टे, मानवळे, बारवे, पाल, बामणे येथे वळीव पावसाने हजेरी लावली. पेरणीपूर्व मशागतीच्‍या कामांसाठी हा पाऊस उपयुक्त आहे. ऊस पिकासाठीही हा पाऊस उपयुक्त ठरणार आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.