Vineyard Damage : खुड्यावर आलेली मंडप पद्धतीची द्राक्षे भुईसपाट

Nashik News : खेडलेझुंगे येथील द्राक्ष उत्पादक शेतकरी कैलास साहेबराव राहणे यांची दोन एकर सुधाकर वाणाची मंडप पद्धतीची द्राक्ष बाग पडल्याने भुईसपाट झाली आहेत. यामुळे शेतकऱ्याचे १० लाखांवर नुकसान झाले आहे.

यंदाचा हंगाम शेतकऱ्यांसाठी प्रतिकूल राहिला. अशा परिस्थितीत विविध समस्यांचा सामना करून तयार केलेली द्राक्ष बाग ऐन खुडे सुरू होण्याच्या तोंडावर कोसळली. द्राक्षांची फुगवण होऊन मण्यांमध्ये साखर उतरली होती.

असे असताना बाग पडल्याने शेतकरी राहणे यांचे मोठे नुकसान झालेले आहे. बागेचे आधार देणारे अँगल वाकून पडल्याने मंडप पद्धतीच्या तारा तुटल्या आहेत. द्राक्ष वेलींवर माल असल्याने वजनामुळे बाग पुन्हा उभी करणे अडचणीचे झाले आहे.

त्यातच बाग पडल्याने काही वेली मोडल्या तर गुणवत्तापूर्ण तयार द्राक्ष घडांचे नुकसान झालेले आहे. लागवडीपश्‍चात १० ते १२ वर्षांपेक्षा अधिक कालावधीपर्यंत द्राक्ष बाग राखता येते. मात्र लाखो रुपयांचे भांडवल गुंतवणूक करून उभी केलेली बाग पडल्याने राहणे कुटुंबीयांवर मोठे संकट कोसळले आहे.

हातातोंडाशी आलेला घास हिरावला

काढणीच्या अवस्थेत आलेली द्राक्षबाग कोलमडून पडल्याने तयार द्राक्ष गडांची नुकसान झाले आहे. त्यामुळे त्याचा प्रतवारी व गुणवत्तेवर परिणाम होणार आहे यासह बाग उभी करून कशी बसे हे घड बाहेर काढावे लागतील.

त्यातच प्रतवारीत घसरण झाल्याने टिकवनक्षमता कमी होणार आहे. त्यात पुन्हा बाग उभी करण्याचा व काही वाचलेला द्राक्ष घडांची खुडे करण्याचा खर्च वाढणार आहे. त्यामुळे वार्षिक फळपीक असलेल्या द्राक्ष बागेचे नुकसान झाल्याने शेतकऱ्याचा तोंडाशी आलेला घास या घटनेमुळे हिरावून घेतल्याची स्थिती आहे.