ॲग्रोवन वृत्तसेवा
Nagpur News : नागपूर ः पतंजली फुड पार्क प्रकल्पाची ८०० टन प्रति दिवस अशी क्षमता आहे. त्यावरुनच या प्रकल्पाला मोठ्या प्रमाणावर संत्रा फळांची गरज राहणार आहे. ही बाब लक्षात घेता संत्रा उत्पादकता वाढीच्या उद्देशाने सिट्रस इस्टेटचे कार्यान्वयनाला चालना देण्यात यावी, अशी मागणी नागपुरी संत्रा फार्मर प्रोड्युसर कंपनीने मुख्यमंत्र्यांकडे केली आहे.
शेतकरी उत्पादक कंपनीच्या संचालकांनी या संदर्भाने मुख्यमंत्री देवेंद्र फडणवीस यांना निवेदन दिले. त्यानुसार, देशातील इतर राज्य तसेच जागतिक स्तरावर विदर्भात उत्पादीत नागपुरी संत्र्याची उत्पादकता फारच कमी आहे. उत्पादकतेत वाढीला चालना देण्यासाठी २०१९ मध्ये शासनाने या भागात सिट्रस इस्टेटच्या उभारणीला मान्यता दिली. यामध्ये सध्या रोपवाटिका, यांत्रिकीकरण, माती परीक्षण प्रयोगशाळा तसेच प्रशिक्षणाच्या सोयी सुविधा उपलब्ध करुन देण्यात आल्या आहेत.
ढीवरवाडी (काटोल), उमरखेड, तळेगाव या ठिकाणी सिट्रस इस्टेट आहेत. परंतु संत्रा बागांच्या पृथ्थकरणात महत्त्वाची भूमिका बजावणारी लिफ (पान) तपासणी प्रयोगशाळा अद्याप उभारलेली नाही. त्यासोबतच संत्रा लागवड क्षेत्र असलेल्या कळमेश्‍वर, सावनेर, नरखेड, वरुड, अचलपूर या तालुक्‍यांत सिट्रस इस्टेट स्थापण्याबाबतही उदासीनता आहे. या भागातील शेतकऱ्यांपर्यंत देखील लागवड ते काढणी आणि मार्केटिंग पर्यंतच्या तंत्रज्ञानाची उपलब्धता व्हावी याकरिता या तालुक्‍यात देखील सिट्रस इस्टेटची उभारणी करावी.
सिट्रस इस्टेटचे कामकाज वसंतदादा शुगर इन्स्टिट्यूटच्या धर्तीवर चालावे. विपणन व्यवस्थेच्या अभावी ६० ते ७० टक्‍के शेतकरी त्यांच्याकडील उत्पादीत फळांची विक्री दलाल किंवा व्यापाऱ्यांना जागेवरच करतात. थेट मार्केटिंग करुन अधिकचा नफा कमविणाऱ्या शेतकऱ्यांचे प्रमाण अत्यल्प आहे. ही बाब लक्षात घेता काटोल, कळमेश्‍वर, नरखेड, वरुड, मोर्शी, परतवाडा या बाजार समित्यांच्या परिसरात निर्यात सुविधा केंद्राची उभारणी करावी. त्यामध्ये ग्रेडींग, कोटींग युनिट, कोल्डस्टोरेज, पॅकिंग सेंटर, प्रीकुलींग अशी व्यवस्था असावी.
महाराष्ट्र राज्य कृषी पणन मंडळाच्या मार्फत याकरिता निधी देण्यात यावा. निर्यात व प्रक्रियेच्या दृष्टीने योग्य व नवीन वाण विकसित होणे गरजेचे आहे. त्यासाठी फळातील ऍसिड व ब्रीक्‍स या संदर्भात संशोधन होऊन त्या दृष्टीने वाणाची शिफारस करण्यात यावी. संशोधन संस्थांनी त्यासाठी पुढाकार घ्यावा. संत्रा फळाचा आहारात वापर वाढावा याकरिता राज्य सरकार स्तरावर जाहिरात करणे. संत्रा बागाच्या संरक्षणाकरिता ५० टक्‍के अनुदानावर कुंपण.
शालेय पोषण आहारात संत्रा व इतर फळांचा समावेश करावा. आंबा व काजू बोर्डच्या धर्तीवर संत्रा बोर्ड स्थापन करण्यात यावे. संत्रा बागायतदारांसाठी पॅकहाऊस ही योजना राबवीत प्रोजेक्‍ट कॉस्ट वाढविण्यात यावी. सार्क देशामध्ये संत्रा निर्यातीकरिता पणन मंडळाने सार्क देशात कार्यालय स्थापन करावे. मदर डेअरीच्या माध्यमातून संत्रा उत्पादकांसाठी विदर्भात संत्रा प्रकल्प राबवावा, अशी मागणी आहे. निवेदनकर्त्यांमध्ये मनोज जवंजाळ, स्वप्नील धोटे, अपूर्व जवंजाळ, प्रवीण लोहे, प्रणय ठाकरे यांचा समावेश होता.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.