Soybean Production Amaravati: दुष्काळामुळे सोयाबीनचे उत्पादन घटले असताना खुल्या बाजारात हमीदरापेक्षा अधिक भाव मिळत आहे. मात्र, उत्पादनातील मोठ्या घटीमुळे दरवाढीचा लाभ शेतकऱ्यांना मिळेनासा झाला आहे. अमरावती शेवती येथील अनिल राठोड यांच्या चार एकरांतील सोयाबीन विक्रीतून मिळणारे उत्पन्न गतवर्षीच्या एक लाख २१ हजार २०० रुपयांवरून यंदा अवघ्या ३५ हजार ४४८ रुपयांवर आले आहे. त्यामुळे चांगला भाव असूनही सोयाबीनने शेतकऱ्यांचे अर्थचक्र बिघडवले आहे..अमरावती जिल्ह्यातील पीककापणी प्रयोगांतून सोयाबीनचे हेक्टरी सरासरी उत्पादन सहा ते सात क्विंटलपर्यंत असल्याचे समोर आले आहे. विशेषतः कोरडवाहू क्षेत्रात उत्पादनात मोठी घट झाली आहे. केंद्र सरकारने यंदाच्या हंगामासाठी सोयाबीनचा हमीदर प्रति क्विंटल ५,७०८ रुपये निश्चित केला आहे. त्याच्या तुलनेत खुल्या बाजारात अधिक भाव मिळत असला, तरी कमी उत्पादनामुळे शेतकऱ्यांच्या हाती पुरेसे पैसे पडत नसल्याचे चित्र आहे..Soybean Price: चंदनखेडा उपबाजारात सोयाबीनला ६४०० रुपये दर.दसऱ्याच्या पार्श्वभूमीवर गेल्या आठवड्यापासून शेतकऱ्यांनी सोयाबीन विक्रीसाठी बाजारात आणण्यास सुरुवात केली. सुरुवातीला प्रतिक्विंटल ६,३०० ते ६,८०० रुपये, सरासरी ६,५५० रुपये दर मिळाला. काही काळ दर सात हजार रुपयांच्या टप्प्यापर्यंत पोहोचले होते. मात्र, आवक वाढल्यानंतर दरात घसरण झाली. ९ ऑक्टोबरला ९,०३३ पोत्यांची आवक होऊन सरासरी ६,५५० रुपये दर मिळाला होता..Soybean Prices: सोयाबीन ठरणार ‘गोल्डन बीन’.१२ ऑक्टोबरला आवक वाढून १५,७५७ पोत्यांवर पोहोचली, त्या वेळी सरासरी दर ६,३०१ रुपयांवर आला. १३ ऑक्टोबरला १२,०२४ पोत्यांची आवक झाली आणि सरासरी दर ६,३३० रुपये राहिला. ९ ऑक्टोबरच्या तुलनेत १२ ऑक्टोबरला दरात प्रतिक्विंटल २४९ रुपयांची घसरण झाली. त्यामुळे अपेक्षित दरवाढीच्या आशेने बाजारात आलेल्या शेतकऱ्यांना कमी दराचा फटका बसला..चार एकरांतून उत्पन्नात ८५ हजारांची घटशेवती येथील शेतकरी अनिल राठोड यांना गतवर्षी चार एकरांतून एकरी सहा क्विंटलप्रमाणे २४ क्विंटल सोयाबीनचे उत्पादन मिळाले होते. प्रति क्विंटल ५,३०० रुपये दराने विक्री केल्यामुळे त्यांना एकूण एक लाख २१ हजार २०० रुपये मिळाले होते. यंदा मात्र याच क्षेत्रातून केवळ पाच क्विंटल ६० किलो सोयाबीनचे उत्पादन झाले. १३ ऑक्टोबरला प्रतिक्विंटल ६,३३० रुपये दराने विक्री केल्यानंतर त्यांच्या हाती केवळ ३५ हजार ४४८ रुपये पडले. म्हणजेच दर वाढूनही विक्री उत्पन्नात तब्बल ८५ हजार ७५२ रुपयांची घट झाली. उत्पादनातील घटीची तीव्रता या उदाहरणावरून स्पष्ट होते..सोयाबीन आयातीची धास्तीदेशांतर्गत सोयाबीन उत्पादन घटल्याने आयातीची शक्यता व्यक्त होत आहे. आयातशुल्क माफ करून सोयाबीन आयात झाल्यास देशांतर्गत बाजारातील दरावर दबाव येण्याची भीती खरेदीदारांकडून व्यक्त केली जात आहे. बाजार समितीतील अडते राजेश पाटील यांच्या मते, सध्या शेतकऱ्यांना हमीदरापेक्षा अधिक भाव मिळत असला, तरी आगामी काळात हे दर कायम राहतीलच, याची खात्री नाही. त्यामुळे उत्पादन घट आणि दरातील अनिश्चितता अशा दुहेरी संकटात सोयाबीन उत्पादक सापडले आहेत..ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
