Surya Ghar Yojana : अडीच हजार घरांवर सौर पॅनेलचे काम पूर्ण

Solapur News : प्रधानमंत्री सूर्यघर योजनेअंतर्गत सोलापूर जिल्ह्यात ८ हजार २२८ अर्ज दाखल झाले असून, त्यापैकी ८ हजार १७९ अर्जांना मंजुरी देण्यात आलेली आहे. तर त्यापैकी ५ हजार ८११ घरांवर सध्या सौर पॅनेल बसवण्याचे काम सुरू असून, त्यातील अडीच हजार घरांवर पॅनेलचे काम पूर्ण झाले आहे, अशी माहिती जिल्हा प्रशासनाच्या वतीने देण्यात आली.

भारतात सौर ऊर्जा वापरण्याची गरज वाढत आहे आणि याच पार्श्‍वभूमीवर पंतप्रधान सूर्यघर योजना सुरू करण्यात आली आहे. या योजनेचा मुख्य उद्देश घरगुती वापरासाठी सौर ऊर्जा प्रणालींचा प्रसार करणे आणि नागरिकांना या पर्यावरणीय उपक्रमात सहभागी करणे आहे. स्वतःचे घर असणाऱ्या प्रत्येक नागरिकाला यात सहभाग घेता येतो.

घराच्या छतावर सोलर पॅनेल बसवण्यासाठी पुरेशी जागा असणे आवश्यक आहे. यामुळे सौर पॅनेल प्रभावीपणे कार्य करू शकतात आणि ऊर्जा उत्पादनात वाढ होईल. या योजनेसाठी अर्ज करणे आणि आवश्यक कागदपत्रे जमा करणे अनिवार्य आहे.

अर्जदाराकडे वैध वीज जोड असावा, कारण योजनेचा फायदा घेण्यासाठी वीज जोडची गरज असते. तसेच अर्जदाराने यापूर्वी कोणत्याही इतर सोलर पॅनल सबसिडीचा लाभ घेतलेला नसावा. या योजनेअंतर्गत सौर ऊर्जा प्रणालीच्या क्षमतेवर आधारित सबसिडीची मदत दिली जाते.

तीन श्रेणींमध्ये सौर पॅनेल

या योजनेत सहभागासाठटी तीन प्रमुख श्रेणी आहेत. त्यात शून्य ते १५० युनिटनिर्मिती, सौर ऊर्जा प्रणाली क्षमता १ ते २ किलोवॅट आणि सबसिडी ३०,००० ते ६०,००० रुपये, १५०-३०० युनिटनिर्मिती- सौर ऊर्जा प्रणाली क्षमता २ ते ३ किलोवॅट आणि सबसिडी ६०,००० ते रु. ७८,००० रुपये आणि ३०० पेक्षा जास्त युनिटनिर्मिती, सौर ऊर्जा प्रणाली क्षमता ३ किलोवॅटपेक्षा जास्त आणि सबसिडी ७८,००० रुपये मिळते.