Ration Grain : रेशन धान्य वाटपात सोलापूर राज्यात प्रथम

Solapur News : रेशन प्रणालीतील धान्य वाटपात सोलापूर अन्नधान्य वितरण कार्यालय राज्यात प्रथम आले आहे. केंद्रीय अन्न सुरक्षा अधिनियम २०१३ अनुसार प्रत्येक महिन्याच्या ७ ते १५ तारीख हे अन्न सप्ताह म्हणून साजरा करणे हे दुकानदारांना अनिवार्य आहे.

अन्नसुरक्षा योजनेत लाभार्थींना आपण खात असलेले सकस व पौष्टिक धान्या बाबतची जागरूकता समजावणे हा मुख्य उद्दिष्ट आहे. परंतु मागील दहा वर्षात राज्यभरात हे मोहीम राबवीत नसल्याचे स्पष्टपणे चित्र दिसून येत असताना, सोलापूर शहर अन्नधान्य वितरण अधिकारी कार्यालयाने ह्या मोहिमेला सकारात्मक भूमिका घेऊन ऑक्टोबर महिन्यात धान्य वाटपात राज्यात पहिला क्रमांक पटकाविला आहे.

अन्नधान्य वितरण अधिकारी यांनी सुरवातीला रास्त भाव धान्य दुकानंदाराची बैठक घेऊन त्यांना लाभार्थीमध्ये या अन्नसप्ताह मोहिमेबाबत जनजागृती करण्याची सक्त सूचना देण्यात आली होती.

त्याप्रमाणे मागील अवघ्या दोनच महिन्यात नागरिकांमध्ये जनजागृती होऊन रेशन दुकानासमोर रांगा दिसत आहेत, जे दुकानदार जाणीवपूर्वक धान्य उशिरा वाटप करत आहेत, अशा सर्वांना कार्यालयाच्यावतीने नोटिसा बजावण्यात आल्या. तर दुसरीकडे मात्र महिनाभर रेशन दुकानाचे हेलपाटे मारणाऱ्या लाभार्थींनी महिन्याच्या पंधरवड्यातच धान्य मिळाल्याने समाधान व्यक्त केले आहे.