Urea Shortage : अकोल्यात शोधाशोध करूनही युरिया मिळेना

Akola Urea News : पिकांना खतमात्रा देण्यासाठी शेतकरी युरियाची शोधाशोध करीत आहेत. पुरवठा कमी होत असल्याने दिवसेंदिवस बिकट परिस्थिती होत आहे. स्थानिक अधिकाऱ्यांना शेतकऱ्यांच्या रोषाला सामोरे जावे लागत आहे. तर काही विक्रेते कृत्रिम टंचाई निर्माण करण्याचाही प्रयत्न करीत असल्याचे प्रकार समोर येऊ लागले आहेत.

अकोला जिल्ह्यात ऑगस्टपर्यंत सुमारे १८ हजार टन युरियाचा पुरवठा अपेक्षित होता. मात्र, आतापर्यंत केवळ १२ ते साडेबारा हजार टन युरिया पुरविण्यात आल्याची माहिती आहे. त्यातच आता पाऊस उघडल्याने कपाशी व इतर पिकांना युरिया टाकण्यासाठी शेतकऱ्यांची एकच लगबग सुरु आहे. मात्र युरिया मिळत नसल्याने ओढाताण होत आहे. सोमवारी (ता.२१) बहुजन वंचित आघाडीच्या पदाधिकाऱ्यांनी कृषी विभागात आंदोलन करीत अधिकाऱ्यांसह काही कृषी विक्रेत्यांकडे पाहणी केली.

अधिकाऱ्यांसमोर विक्रेत्याने युरिया नसल्याचे सांगितले. तर दुसरीकडे मात्र झाडाझडती घेतली असता २३ बॅग युरिया मिळाला. असे प्रकार सर्रास सुरु असून काही विक्रेते कृत्रिम टंचाई निर्माण करीत फायदा उठवत आहेत. या विक्रेत्याच्या मालाचा तत्काळ पंचनामा करण्यात आला. युरियाची वाढती मागणी पाहता ३१२ टन बफरस्टॉक जिल्हाधिकाऱ्यांच्या निर्देशानुसार रिलीज करण्यात आला. पॉसवर अडीच हजार टन साठा दिसत आहे. तरीही ग्रामीण भागात युरियाची टंचाई आहे.

‘वाशीम, बुलडाण्यात परिस्थिती नियंत्रणात’

‘‘वाशीम जिल्ह्यात जुलैच्या शेवटच्या आठवड्यात तसेच ऑगस्टच्या सुरवातीला युरियाबाबत ओरड झाली. मात्र, नंतर विविध कंपन्यांचा रॅक लागल्याने युरियाचा प्रश्न मिटला आहे. सध्या मुबलक युरिया उपलब्ध असल्याची माहिती प्रभारी कृषी विकास अधिकारी गणेश गिरी यांनी दिली. तर बुलडाणा जिल्ह्यात युरियाची टंचाई नाही. रेल्वेरॅक सातत्याने येत असल्याने युरिया पुरेसा आहे,’’ अशी माहिती कृषी विकास अधिकारी सी. एन. पाटील यांनी दिली.