Kolhapur Shivaji University : कोल्हापूर, सांगली, सातारा जिल्ह्यात संततधार, शिवाजी विद्यापीठाने पेपर ढकलले पुढे

Kolhapur Shivaji University : कोल्हापूर, सांगली, सातारा जिल्ह्यांत अतिवृष्टी सुरू आहे. त्यामुळे अनेक विद्यार्थ्यांना परीक्षा केंद्रात येणे अडचणीचे ठरणार आहे. ते लक्षात घेऊन विद्यार्थी हितास्तव शिवाजी विद्यापीठाने सोमवारी (ता. २२) होणारे सर्व पेपर पुढे ढकलले आहेत.

त्यात फार्मसी, लॉ, आदी अभ्यासक्रमांच्या पेपरचा समावेश आहे. पेपर स्थगित केल्याची माहिती विद्यार्थ्यांना ‘एसएमएस’व्दारे रात्री उशिरा कळविण्यात आली आहे. तसेच ही माहिती विद्यार्थ्यांना देण्याची सूचना महाविद्यालयांना परिपत्रकाद्वारे केली असल्याची माहिती विद्यापीठ परीक्षा व मूल्यमापन मंडळाचे संचालक डॉ. अजितसिंह जाधव यांनी दिली.

विद्यापीठ कार्यक्षेत्रात गेल्या तीन दिवसांपासून अतिवृष्टी सुरू आहे. त्यामुळे नदी नाले ओढे तुडुंब भरून वाहत आहेत. परिणामी, वाहतुकीस अडथळा येत असल्याने विद्यार्थ्यांना परीक्षेला येण्यास त्रास होण्याची शक्यता आहे. त्यामुळे विद्यार्थी हित लक्षात घेता विद्यापीठाने सोमवारी होणारे सर्व विषयांचे पेपर पुढे ढकलण्यात आले आहेत. या बदलाची विद्यार्थ्यांनी नोंद घ्यावी. पेपरच्या नव्या तारखा विद्यापीठाच्या संकेतस्थळावर प्रसिद्ध केल्या जातील, अशी माहिती डॉ. जाधव यांनी दिली.

दरम्यान, अतिवृष्टीमुळे परीक्षा देणे शक्य होणार नसल्याने सोमवारी होणाऱ्या परीक्षा स्थगित कराव्यात, अशी मागणी काही विद्यार्थ्यांनी राज्य नियोजन मंडळाचे कार्यकारी अध्यक्ष राजेश क्षीरसागर यांच्याकडे केली होती.

त्यावर क्षीरसागर आणि युवासेना शहरप्रमुख मंदार पाटील यांनी परीक्षा संचालक डॉ. जाधव यांच्यापर्यंत विद्यार्थ्यांची मागणी पोहोचवली. त्याची दखल आणि विद्यार्थी हित लक्षात घेऊन विद्यापीठाने हा निर्णय घेतला आहे.