Karjat Market Committee : कर्जत बाजार समितीत फेरमतमोजणीत जागा ‘जैसे थे’

Nagar APMC News : कर्जत कृषी उत्पन्न बाजार समितीच्या निवडणूक निकालात फेरमतमोजणीनंतर फेरबदल झाला नाही. परिस्थिती जैसे थे राहिली. त्यामुळे आमदार रोहित पवार आणि आमदार राम शिंदे यांच्या गटाच्या प्रत्येकी नऊ जागा कायम राहिल्या आहेत. सभापती आणि उपसभापती कोणाचा होणार, याकडे लक्ष लागले आहे.

फेरमतमोजणीमध्ये ग्रामपंचायत गटातील सुवर्णा कळसकर यांचे एक मत कमी झाले आहे, तर सर्वसाधारण मतदारसंघातील गुलाब तनपुरे आणि संग्राम पाटील यांचे प्रत्येकी एक मत वाढले आहे. या व्यतिरिक्त इतर जागांमध्ये कोणताही बदल झाला नाही.

कर्जत कृषी उत्पन्न बाजार समिती निवडणुकीत आमदार राम शिंदे व आमदार पवार गटाला प्रत्येकी ९ जागा मिळाल्या.

आमदार राम शिंदे पॅनेलच्या कृषी पतसंस्था मतदार संघातील सर्वसाधारण गटातील उमेदवार भरत पावणे आणि महिला राखीव गटातील लीलावती जामदार यांनी निकालाला आव्हान देत फेरमतमोजणीची मागणी केली होती.

नगर जिल्हा उपनिबंधक (सहकारी संस्था) गणेश पुरी यांच्या समोर वादी-प्रतिवादी यांच्यात युक्तिवाद होत सहायक निबंधक तथा निवडणूक निर्णय अधिकार व उमेदवारांच्या साक्षी झाल्या.

त्यानंतर जिल्हा उपनिबंधक पुरी यांनी कृषी पतसंस्था मतदार संघातील सर्वसाधारण गटातील एक व महिला राखीव गटातील एक आशा दोन जागांसाठीही फेर मतमोजणी करण्याचे आदेश दिले होते. त्यानुसार फेरमतमोजणी झाली. मात्र, निकालात कोणताही बदल झालेला नाही.