Rain Update Vidarbha : पश्चिम विदर्भात हलक्या सरी

Akola News : पश्चिम विदर्भातील अकोला, वाशीम, बुलडाणा जिल्ह्यांमध्ये मागील २४ तासांत काही भागात पावसाच्या हलक्या सरींनी हजेरी दिली. या पावसामुळे शेतकऱ्यांमध्ये थोडासा दिलासा निर्माण झाला असला तरी पेरणीसाठी अद्यापही जोमदार पाऊस हवा आहे. गेल्या काही दिवसांपासून ढगाळ हवामान असूनही समाधानकारक पाऊस न झाल्यामुळे शेतकरी पेरण्यांच्या अनुषंगाने चिंतेत आहेत .

यावर्षी जून महिन्यात आजवर दमदार पाऊस झालेला नाही. काही भागात मध्यम स्वरूपाचा पाऊस झालेला आहे. त्यामुळे जमिनीत जेमतेम ओल तयार झाली. त्यावरच बऱ्याच शेतकऱ्यांनी पेरणी धरली. या पेरण्या उगवल्या तरी पाऊस कमी असल्याने आता त्यांच्यावर चिंतेचे ढग तयार झाले आहेत.

मालेगाव (जि. वाशीम) तालुक्यात खूप कमी प्रमाणात पाऊस झाले आहे. आजवर पेरणी योग्य पाऊस झालाच नाही. तरीही बऱ्याच शेतकऱ्यांनी हवामान तज्ज्ञांच्या सल्ल्यांवरून पेरणी केली आहे. परंतु आता पाऊस होत नसल्याने झालेल्या पेरणीपैकी २५ ते ३० टक्के पेरणी वाया जाण्याची भीती आहे. बऱ्याच शेतकऱ्यांना दुबार पेरणी करण्याची वेळ मालेगाव तालुक्यात निर्माण होत आहे.

मलाही १० एकर क्षेत्र मोडून परत पेरावे लागणार आहे, अशी माहिती शेतकरी विनोद पाटील (सुदी) यांनी दिली. लोणार (जि. बुलडाणा ) तालुक्यात जून महिन्यात आतपर्यंत फक्त ३२ मिलिमीटर पाऊस झाला. १३ व १४ जून रोजी झालेल्या पावसाच्या भरवशावर शेतकऱ्यांनी पेरणी केली. त्यानंतर आजपर्यंत चांगला पाऊस झालेला नाही, असे शेतकरी सांगत आहेत. अशी स्थिती सर्वच तालुक्यात आहे. पाऊस झाला तरी तो पाच-दहा किलोमीटरच्या परिसरातही समसमान असेल याची कुठलीही खात्री नाही. शिवार बदलले तरी पाऊस कमी-जास्त झाल्याचे दिसून येत आहे.

पेरणी रखडण्याची भीती

खरिपात या भागात सोयाबीन हेच मुख्य पीक आहे. बुलडाणा जिल्ह्यात सुमारे चार लाख हेक्टरपर्यंत, तर वाशीममध्ये अडीच लाख, अकोल्यात दोन लाख हेक्टरपेक्षा जास्त क्षेत्रावर सोयाबीनची लागवड होत असते.

ज्या शेतकऱ्यांनी हिमतीने पेरण्या धरल्या त्यांच्यासमोर आता अडचणी तयार होऊ लागल्या आहेत. येत्या दोन-तीन दिवसांत जोरदार पाऊस न झाल्यास पेरणी रखडेल की काय अशी भीती वाटते आहे. हवामान खात्याने रविवार (ता.२९) पर्यंत या भागात पावसाचा इशारा दिलेला आहे. सर्वत्र ढगाळ वातावरण असून शेतकरी पावसाच्या प्रतीक्षेत आहेत.