Nashik News : येथील सटाणा कृषी उत्पन्न बाजार समितीची पंचवार्षिक निवडणूक येत्या ३१ मार्चला होणार असून, १ एप्रिलला मतमोजणी होऊन निवडणूक निकाल जाहीर होणार आहे. निवडणूक निर्णय अधिकारी व बागलाणचे सहायक निबंधक जितेंद्र शेळके यांनी माहिती दिली.
सटाणा कृषी उत्पन्न बाजार समितीच्या संचालक मंडळाच्या पंचवार्षिक निवडणुकीसाठी नामनिर्देशन पत्र दाखल करण्याची अंतिम मुदत येत्या तीन मार्चला दुपारी तीन पर्यंत राहणार आहे. सटाणा कृषी उत्पन्न बाजार समितीवर गेल्या सहा महिन्यांपासून शासन नियुक्त प्रशासक समिती नेमण्यात आली होती. बाजार समितीची मुदत संपल्याने राज्य सहकार प्राधिकरण निवडणूक व जिल्हा निवडणूक अधिकारी यांनी जाहीर केलेल्या सटाणा कृषी उत्पन्न बाजार समिती सदस्यांची निवडणूक कार्यक्रम जाहीर झाला.
येत्या ३ मार्चला दुपारी तीनपर्यंत इच्छुकांना नामनिर्देशन पत्र दाखल करण्याची अंतिम मुदत देण्यात आली आहे. ४ फेब्रुवारीस नामनिर्देशन पत्र छाननी होईल. निवडणुकीस पात्र नामनिर्देशन पत्र ५ ते १९ मार्चपर्यंत माघार घेता येणार आहे.
उमेदवारांची अंतिम यादी २० मार्चला प्रसिद्ध करण्यात येणार आहे. माघारीनंतर थेट गटनिहाय मतदान ३१ मार्चला होणार आहे. तर मतमोजणी एक एप्रिल २०२५ ला होणार आहे. बाजार समितीत १८ सदस्य निवडून देण्यासाठी ही निवडणूक होणार आहे.
मतदार यादी प्रसिद्ध झाली होती. दरम्यान तालुक्यातील काही ग्रामपंचायतींवर प्रशासक नियुक्ती असून तेथील इच्छुकांनी न्यायालयात धाव घेतली; मात्र त्यांना दाद न मिळाल्याने अंतिम मतदार यादी मंजूर झाली व निवडणुकीचा मार्ग खुला झाला जुन्या पद्धतीने निवडणूक होणार असल्याने बऱ्याच इच्छुकाचा हिरमोड झाला असून राजकीय हालचाली गतिमान झाल्या आहेत. सटाणा कृषी उत्पन्न बाजार समितीच्या संचालक मंडळाची मुदत दोन वर्षांपूर्वीच संपली होती.
गटनिहाय मतदार असे...
तालुक्यातील ४८ विविध कार्यकारी सोसायटीचे ५५३ मतदार, सोसायटी गटातून ६५ ग्रामपंचायतींचे ४८१, आडते व व्यापारी गटातील २३७ मतदार तर हमाल व मापारी मतदार गटातील ११५ असे एकूण १३८६ मतदार बाजार समितीसाठी मतदान करणार आहेत. सहकारी संस्था म्हणजेच सोसायटी गटातून ११ सदस्यांची निवड होणार आहे.
सर्वसाधारण गटातून सात महिला राखीव गटातून दोन, मागासवर्गीय गटातून एक, विमुक्त व भटक्या जमाती गटातून एक तर ग्रामपंचायत मतदार संघातून चार सदस्यांपैकी सर्वसाधारण दोन, अनुसूचित जाती व जमाती गटातून एक, आर्थिक दुर्बल घटकातून एक, तर मापारी गटातून दोन सदस्य, हमाल व तोलारी गटातून एक सदस्य, अशा एकूण १८ सदस्यांकरिता निवडणूक होणार आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.