Sarsenapati Santaji Ghorpade Sugar Factory : सरसेनापती संताजी घोरपडे साखर कारखान्याकडून शेतकऱ्यांची दिवाळी गोड!, जमा केले ऊस बिलापोटी प्रती टन ५० रुपये

Kolhapur News : राज्यात विधानसभेचे वारे वाहू लागले असून सोमवार (ता.२२) पासून उमेदवारी अर्ज भरण्यास प्रारंभ होणार आहे. यातच आता दिवाळी आल्याने सर्वसामान्यांची दिवाळी गोड होणार अशी चर्चा रंगली आहे. याचदरम्यान सरसेनापती संताजी घोरपडे साखर कारखान्याने तोडग्यानुसार अतिरिक्त ऊस बिलापोटी प्रती टनाला ५० रुपयांप्रमाणे फरक बिल शेतकऱ्यांच्या खात्यावर जमा केले आहे. याबाबतची माहिती कारखान्याचे जनरल मॅनेजर संजय घाटगे यांनी पत्रकातून दिली आहे. तर सरसेनापती संताजी घोरपडे साखर कारखाना कोल्हापुरचे पालकमंत्री आमदार हसन मुश्रीफ यांचा आहे.

जनरल मॅनेजर घाटगे यांनी काढलेल्या पत्रकातून, गेल्यावर्षी पालकमंत्री हसन मुश्रीफ, शेतकरी संघटना व जिल्हाधिकारी यांच्यामध्ये अतिरिक्त ऊस बिलावर तोडगा काढण्यात आला होता. त्या तोडग्याप्रमाणे अतिरिक्त ऊस बिलापोटी प्रती टनाला ५० रुपये देण्याचे मान्य केले होते. ते ५० रुपये शेतकऱ्यांच्या खात्यावर जमा करण्यात आले आहे. यामुळे ऊस उत्पादक शेतकऱ्यांनी मंगळवारपासून (ता. २२) आपापल्या बँकांशी संपर्क साधावा, असे आवाहन कारखान्याचे जनरल मॅनेजर घाटगे यांनी पत्रकात केले आहे.

तसेच या पत्रकातून गेल्या गळीत हंगामात म्हणजेच सन २०२२-२०२३ या गळीत हंगामात ‘एफआरपी’ प्रती टनाला २९०४.७९ रूपये निश्चित करण्यात आला होता. पण कारखान्याने प्रत्यक्षात प्रती टनाला रुपये ३ हजारांप्रमाणे ऊसदर दिला आहे. तसेच कारखाना प्रशासनाने यावर्षी कामगारांना बोनसपोटी १६.६६ टक्के म्हणजेच दोन पगार देखील देण्याचे ठरवले आहे.

चालू गळीत हंगाम म्हणजेच सन २०२४ – २०२५ या गळितासाठी शेतकऱ्यांनी पिकविलेला सर्व ऊस गाळपसाठी कारखान्याकडे पाठवून सहकार्य करण्याचे आवाहन देखील या पत्रकातून करण्यात आले आहे. तर यापुढेही सरसेनापती साखर कारखाना सर्वाधिक ऊस दर देण्यासाठी कटिबद्ध असेल असेही पत्रकात म्हटले आहे.

दरम्यान बिद्री साखर कारखान्याने देखील ऊस उत्पादकांना वाढीव ऊस दराचा दुसरा हप्ता देऊन दिवाळी गिफ्ट दिले आहे. कारखान्याने ऊस उत्पादक शेतकऱ्यांना १०७ रुपयांचा दुसरा हप्ता अदा केला आहे. वाढीव ऊस दराच्या दुसरा हप्तापोटी १० कोटी २१ लाख रूपये ऊस पुरवठादारांच्या बँक खात्यावर वर्ग करण्यात आले आहेत. तर आजअखेर ३४०७ रुपये प्रमाणे होणारी २२५ कोटी २५ लाख रुपयांची रक्कम संबंधितांना आदा केल्याची माहिती कारखाना प्रशासनाने दिली होती.