Bribery Arrest : सरपंचाच्या पतीला हजार रुपयांची लाच घेताना रंगहात अटक

Akola News : वडिलांच्या नावे असलेले घर बक्षीसपत्रान्वये नावावर झाले. त्या बक्षीसपत्राची ग्रामपंचायत अभिलेखावर नोंद घेऊन घराचा नमुना आठ मिळण्यासाठी ग्रामपंचायत सरपंच पतीने तीन हजारांची लाच मागितली. या प्रकरणी एक हजार रुपये स्वीकारताना सरपंचपती देवानंद जामनिक याला मूर्तिजापूर येथे अटक करण्यात आली. लाचलुचपत प्रतिबंधक विभागाने कारवाई करीत गुन्हा दाखल करण्यात आला आहे.

या बाबत पोलिसांनी दिलेल्या माहितीनुसार, तक्रारदाराने २६ फेब्रुवारीला लाचलुचपत विभागात तक्रार दिली, की वडिलांनी त्यांच्या नावे सालतवाडा (ता. मूर्तिजापूर) येथील विटा सिमेंटचे पक्के बांधकाम केलेले घर बक्षीसपत्रान्वये तक्रारदाराच्या नावावर केले आहे. संबंधित बक्षीसपत्राची नोंद ग्रामपंचायत अभिलेखावर घेऊन घराचा नमुना ८ अ मिळण्यासाठी सालतवाडा गट ग्रामपंचायतीकडे मागणी केली.

या गट ग्रामपंचायतीत महिला सरपंच सीमा देवानंद जामनिक यांचे सर्व काम त्यांचे पती गैरअर्जदार देवानंद जामनिक पाहत असल्याने तक्रारदार हे त्यांना भेटले. बक्षीसपत्राची नोंद ग्रामपंचायत अभिलेखावर करून घराचा नमुना ८ अ देण्यास विनंती केली. त्यावर सरपंच पती देवानंद जामनिक यांनी तक्रारदाराला तीन हजार रुपये लाचेची मागणी केली.

या तक्रारीच्या आधारे २६ फेब्रुवारीला मूर्तिजापूर येथे आंबेडकर चौकात शासकीय पंचासमक्ष पडताळणी करण्यात आली. देवानंद जामनिक यांनी तडजोडी अंति एक हजार रुपयांची लाच मागणी केली असल्याचे निष्पन्न झाले. त्यानंतर गुरुवारी (ता. २७) शासकीय पंचासमक्ष सापळा कार्यवाही करण्यात आली.

देवानंद जामनिक यांनी तक्रारदाराकडून रक्कम स्वीकारल्याने ताब्यात घेत भ्रष्टाचार प्रतिबंधक अधिनियम १९८८ चे कलम ७ प्रमाणे मूर्तिजापूर पोलिस ठाण्यात गुन्हा दाखल करण्यात आला.

ही कार्यवाही पोलिस अधीक्षक मारुती जगताप, अपर पोलिस अधीक्षक सच्छिंद्र शिंदे व पोलिस उपअधीक्षक मिलिंदकुमार बहाकर यांच्या मार्गदर्शनाखाली पोलिस निरीक्षक सचिन सावंत, पोलिस अंमलदार डिगांबर जाधव, किशोर पवार, प्रदीप गावंडे, अभय बावस्कर, नीलेश शेगोकार, श्रीकृष्ण पळसपगार, चालक सलिम खान यांनी केली.