Rohit Pawar : रोहित पवार यांच्या अडचणीत वाढ; आज ईडीची चौकशी; शरद पवार गटाचे जारदार शक्तीप्रदर्शन

Pune News : राज्यात गेल्या काही दिवसांपासून अंमलबजावणी संचालनालयाकडून (ED) छापेमारी आणि चौकशी केली जात आहे. विशेषत: महाविकास आघाडीतील नेत्यांवर छापेमारी आणि चौकशीचा ससेमिरा लागला आहे. याच्याआधी शिवसेना ठाकरे गटाचे आमदार राजन साळवी, आमदार रवींग्र वायकर आणि मुंबईच्या माजी महापौर किशोरी पेडणेकर यांच्यावर ईडीने फास आवळला आहे. त्यापाठोपाठ आता ईडीने आपला मोर्चा शरद पवार गटाचे आमदार रोहित पवार यांच्याकडे वळवला आहे. रोहित पवार यांना ईडीने समन्स बजावत बुधवारी चौकशीला हजर राहण्याचे निर्देश दिले होते.

त्याप्रमाणे रोहित पवार हे चौकशीला सामोरे जाणार आहेत. मात्र याच्याआधी मुंबईत त्यांना पाठिंबा देण्यासाठी महाविकास आघाडीचे नेते आणि शरद पवार गटाचे कार्यकर्ते मोठ्या प्रमाणात मुंबईत दाखल झाले आहेत. महाराष्ट्र शिखर बँक घोटाळ्याप्रकरणी रोहित पवार यांच्या बारामती अॅग्रोवर ईडीने आठवड्यांपूर्वीच छापेमारी केली होती. तसेच रोहित पवार यांना २४ जानेवारीला ईडीने समन्स बजावला होता.

दरम्यान चौकशीला सामोरे जाण्याच्या आधी रोहित पवार म्हणाले, मी राज्य सरकारच्या बाबतीत प्रश्न उपस्थित केले होते. त्यामुळे माझ्यावर दबाव आणण्यासाठी ही चौकशी केली जातेय. केंद्रीय यंत्रणांचा वापर करून माझ्यावर दबाब आणण्याचा प्रयत्न केला जात आहे. माझी केस अत्यंत साधी आणि सोपी आहे. ईडीने विचारलेल्या प्रश्नांची उत्तरे आणि त्यांनी मागितलेली कागदपत्रे याच्याआधीच मी दिली आहेत.

यानंतरही माझ्यावर दबाव आणण्यासाठी आता पुन्हा चौकशीला बोलावले जात आहे. मी तपास यंत्रानांना सहकार्य करणार आहे. ‘मराठी माणूस नेहमी लढतो, तो कधीही पळून जात नाही, त्यामुळे मी चौकशीला समोर जाईन. पळ काढणार नाही. तर ताठ मानेने चौकशीला सामोरे जाणार’, असेही ते म्हणाले.

शरद पवार आणि सुप्रिया सुळे

रोहित पवार यांची आज ईडी चौकशी होणार असून ते ईडीच्या कार्यालयात हजर होणार आहेत. त्यामुळे येथे कार्यकर्त्यांनी मोठी गर्दी करत नारेबाजी केली आहे. तर खासदार सुप्रिया सुळे यांनी त्यांना ईडी कार्यालयापर्यंत सोडायला गेल्या होत्या. तसेच या चौकशीवरून राष्ट्रवादीचे सर्वेसर्वा शरद पवार हे देखील दिवसभर पक्षाच्या कार्यालयातच थांबणार आहेत.

चौकशी कशा बद्दल?

ईडीने आठवड्यांपूर्वीच बारमती अॅग्रो कथित गैरव्यावहार प्रकरणी मुंबईसह सहा ठिकाणी छापेमारी केली होती. बारामती अॅग्रोवर महाराष्ट्र शिखर बँक घोटाळ्याप्रकरणी छापेमारी करण्यात आली होती. तर बारमती अॅग्रो कंपनीची मालकी ही आमदार रोहित पवार यांच्याकडे असल्याने ईडीने रोहित पवारांना नोटीस बजावली होती.