Gokul Milk Rate : गायीचा दूध खरेदी दर पूर्ववत करा, अन्यथा पुरवठा रोखू ; अरुण डोंगळेंना इशारा

Kolhapur News : गायीच्या दुधाचा खरेदी दर पूर्ववत करावा अन्यथा गोकुळचा दूध पुरवठा रोखू असा इशारा, आंदोलन अंकुशच्या वतीने गोकुळचे अध्यक्ष अरुण डोंगळे यांना देण्यात आला.

गाईच्या दुधाचा खरेदी दर पूर्ववत ठेवण्याच्या मागणीसाठी आंदोलन अंकुशचे प्रमुख धनाजी चुडमुंगे यांच्या नेतृत्वाखाली कार्यकर्त्यांनी सोमवारी (ता. ९) कोल्हापूर येथे गोकुळच्या कार्यालयात डोंगळे यांची भेट घेऊन हा इशारा दिला.

या वेळी देण्यात आलेल्या निवेदनात म्हटले आहे की, दूध उत्पादनाचा सध्याचा खर्च हा गोकुळ दूध संघाच्या खरेदी दरापेक्षा जादा येत आहे. त्यामुळे अनेक उत्पादकांनी दूध व्यवसाय बंद करून टाकला आहे. राज्य सरकारने काही महिन्यांपूर्वी परिपत्रक काढून दुधाचा दर निश्चित केला आहे. गोकुळने गायीच्या दूध खरेदी दरात वाढ करून तो ३:५/ ८:५ ला ३७ रुपये जाहीर केला होता. तो आपण कोणतेही कारण नसताना कमी केला. हा निर्णय दूध उत्पादकांसाठी नुकसानकारक आहे.

आपल्या संघांना पुरवठा केलेला ऑटो मिल्क टेस्टरमध्ये फेरफार करून उत्पादकांना फसवण्याचा प्रकार सुरू आहे. त्यावर तत्काळ तपासणी करून हे प्रकार ओळखावेत. येथे आठ दिवसांत गाईच्या दुधाचा दर पूर्वीप्रमाणे न केल्यास शिरोळ तालुक्यातील सर्व दूध उत्पादक एकत्र येऊन आपल्या उदगावस्थित चिल्लींग सेंटरचा दूध पुरवठा रोखला जाईल, असे संघटनेच्या वतीने म्हटले आहे.