ॲग्रोवन वृत्तसेवा
Konkan Brand : सिंधुदुर्गनगरी ः कोरोना कालावधीत कर्जाचे दोन हप्ते न भरल्यामुळे जिल्ह्यातील नाडण (ता. देवगड) येथील महिला उद्योजिका गीतांजली गणेश वेलणकर यांना बँकांनी दीड लाखाचे कर्ज नाकारले होते.
परंतु रविवारी (ता. २) त्यांची यशकथा ‘ॲग्रोवन’ (Agrowon) मधून प्रसिद्ध होताच कर्ज नाकारणाऱ्या बँकांच्या प्रतिनिधींकडून त्यांना कर्जाचा प्रस्ताव द्या तातडीने कर्ज मंजूर करतो, असे सांगितले जात आहे. या सकारात्मक बदलामुळे संपूर्ण वेलणकर कुटुंबीयच भारावून गेले आहे.
जिल्ह्यातील नाडण येथील सौ. वेलणकर यांनी एक, दोन उत्पादनांतून प्रकिया उद्योग सुरू केला. अतिशय प्रतिकूल परिस्थितीत त्यांनी व्यवसायाला आकार दिला. उत्पादनांना असलेल्या दर्जामुळे त्यांच्या उत्पादनांना बाजारपेठेत देखील चांगली मागणी आहे. व्यवसायासाठी परिसरातील एका बँकेकडून त्यांनी कर्ज घेतले होते. या कर्जाचा नियमित हप्ता त्या बँकेत भरीत होत्या. परंतु २०१९-२० मध्ये कोरोनाचे संकट जगावर ओढवले. याचा संपूर्ण उद्योग जगतावर परिणाम झाला. त्याला नाडण येथील लघू उद्योजिका सौ. वेलणकर यांचा विनत प्रकिया उद्योगदेखील अपवाद ठरला नाही. मोठ्या प्रमाणात उत्पादन तयार होते. मागणीदेखील होती, परंतु ग्राहकांपर्यंत माल पोहोचविताना अडचणी येत होत्या. त्यामुळे व्यवसायाची उलाढाल थांबली.
या कालावधीत बँकेकडून घेतलेल्या कर्जाचे दोन हप्ते त्यांना भरता आले नाहीत. त्यानंतर त्यांनी थकित आणि नियमित असे सर्व हप्ते व्याजासह भरले. कर्जाची परतफेड केल्यानंतर त्यांनी व्यवसाय वृद्धीकरिता बँकेकडे पुन्हा कर्जाचा प्रस्ताव दिला.
सुरुवातीला कर्ज मंजूर करूया, असे व्यवस्थापकांनी सांगितले. परंतु प्रस्ताव देताच तुम्ही दोन हप्ते थकविल्यामुळे तुम्हाला कर्ज देता येणार नाही, असे सांगितले. सौ. वेलणकर यांनी अनेकदा बँकेत हेलपाटे मारले, विनवण्या केल्या, परंतु त्यांना कर्ज देण्यात आले नाही.
मात्र जिद्दी आणि प्रचंड मेहनत करण्याची तयारी असलेल्या सौ. वेलणकर यांनी आपला प्रकिया व्यवसाय अधिक जोमाने वाढविला. एवढेच नाही तर ‘रेडी टू कुक’ या संकल्पनेखाली त्यांनी नावीन्यपूर्ण उत्पादने बाजारपेठेत आणली.
सौ. वेलणकर यांच्या प्रकिया उद्योगाची यशकथा ‘ॲग्रोवन’मध्ये रविवारच्या अकांत प्रसिद्ध झाली. त्यांना राज्यभरातून अभिनंदनाचे फोन आले. याशिवाय आणखी एका बँकेच्या व्यवस्थापकांनी देखील कर्जाचा प्रस्ताव द्या, असा आग्रह त्यांच्याकडे धरला आहे.
रविवारी प्रकिया उद्योगाची यशकथा प्रसिद्ध झाल्यानंतर ज्यांनी कर्ज नाकारले त्यांचे अभिनंदनाचे फोन आले. कर्जप्रस्ताव द्या मंजूर करतो, असे सांगण्यात आले. हे केवळ ‘ॲग्रोवन’मध्ये यशकथा प्रसिद्ध झाल्याचा परिणाम आहे. याशिवाय आणखी काही सकारात्मक बदल अनुभवायला मिळत आहेत.
- गीताजंली वेलणकर, प्रकिया उद्योजक, नाडण
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.