Agriculture Irrigation : ‘धरणातून रब्बी हंगामासाठी पाणी आवर्तने सोडा’

Parbhani News : जायकवाडी, निम्न दूधना, येलदरी-सिद्धेश्‍वर या धरणाच्या कालव्याद्वारे रब्बी हंगामातील पेरणी तसेच पिकांच्या सिंचनासाठी पाणी आवर्तने सोडण्यात यावीत, अशी मागणी स्वाभिमानी शेतकरी संघटनेतर्फे जिल्हा प्रशासनाकडे करण्यात आली आहे.

सध्या जिल्ह्यात रब्बीतील ज्वारी, हरभरा, गहू पेरणीसह ऊस लागवड सुरू आहे. जायकवाडी, निम्न दूधना, येलदरी-सिद्धेश्‍वर या धरणात यंदा पुरेसा पाणीसाठा आहे. परंतु पाटबंधारे विभागातर्फे पाणी पाळ्याचे नियोजन तसेच वेळापत्रक जाहीर केलेले नाही.

त्यामुळे शेतकऱ्यांना रब्बी तसेच उन्हाळी हंगामातील पिकांचे नियोजन करता येत नाही. पाणी आर्वतनाचे वेळापत्रक जाहीर केल्यास शेतकऱ्यांना पीक नियोजन करता येईल. यंदा खरीप पिकांच्या उत्पादनात मोठी घट झाली आहे.

पडलेल्या बाजारभावांमुळे सोयाबीन, कापूस, मूग, उडदाचा उत्पादन खर्च निघणे कठिण झाले आहे. खरिपाची कसर रब्बी हंगामात भरुन काढण्यासाठी शेतकरी नियोजन करत आहेत.

त्यासाठी धरणाच्या कालव्याद्वारे तत्काळ पाणी सोडण्यात यावे, अन्यथा स्वाभिमानी शेतकरी संघटनेतर्फे संपूर्ण जिल्ह्यात रास्ता रोको आंदोलन करणार येईल, अशा इशारा स्वाभिमानी शेतकरी संघटनेचे जिल्हाध्यत्र किशोर ढगे, रामप्रसाद गमे, गजानन तुरे, मुंजाभाऊ लोडे, माउली शिंदे, प्रसाद गरुड, पंडित भोसले आदींनी निवेदनाद्वारे दिला आहे.