अॅग्रोवन वृत्तसेवा
Nagar Onion Market : नगर ः नगर येथील दादा पाटील शेळके कृषी उत्पन्न बाजार समितीत गुरुवारी (ता. ४) विक्रमी १ लाख १ हजार ६४६ कांदा गोण्यांची आवक झाली. आवक वाढलेली असताना दर कमीच असल्याने शेतकऱ्यांमध्ये मात्र नाराजी आहे. गुरुवारी प्रतिक्विटंलला २४०० रुपयांपर्यंत व सरासरी १५५० रुपयांचा दर मिळाला.
नगर येथील दादा पाटील शेळके कृषी उत्पन्न बाजार समितीच्या नेप्ती उपबाजारात दर सोमवारी, गुरुवारी आणि शनिवारी लिलाव होतात. गेल्या काही दिवसांपासून बाजार समितीत पुन्हा कांद्याची आवक वाढली आहे.
गुरुवारी (ता. २८ डिसेंबर) ८४ हजार ५८६ गोण्यांची, शनिवारी (ता. ३० डिसेंबर) ७० हजार ९४२ गोण्यांची, सोमवारी (ता. १) ७९ हजार ९३७ गोण्यांची तर गुरुवारी (ता. ४) विक्रमी १ लाख १ हजार ६४६ गोण्यांची आवक झाली. निर्यातबंदीमुळे गेल्या महिनाभरापासून कांद्याचे दर उतरल्याने कांदा उत्पादक शेतकऱ्यांमध्ये नाराजी आहे.
चार ते पाच हजार रुपये प्रतिक्विंटलने विकलेला कांदा केंद्र शासनाच्या कांदा निर्यातबंदीमुळे दोन हजारांवर आल्याने काही शेतकरी संघटनांनी बाजार समितीसमोर आंदोलन केले होते. गेल्या सोमवारी व गुरुवारी दादा पाटील शेळके नगर तालुका कृषी उत्पन्न बाजार समितीच्या नेप्ती उपबाजारात कांद्याच्या दराला कासवगतीने वाढ मिळत असल्याचे कांदा उत्पादक शेतकऱ्यांनी सांगितले.
सध्या बाजारात कांद्याला १ हजार ८०० रुपयांपासून २ हजार ४०० रुपयांपर्यंत दर मिळत आहे. गेल्या महिनाभरात टप्प्याटप्प्याने ४०० ते ५०० रुपयांची वाढ झाली आहे. या महिन्यात कांद्याचे दर तीन हजारांवर जातील, असे जाणकार व्यापाऱ्याने सांगितले.
कांद्याला गुरुवारी (ता. ४) मिळालेला दर
- १ नंबर कांदा - १८०० ते २४००
- २ नंबर कांदा -१२०० ते १८००
- ३ नंबर कांदा - ६०० ते १२००
- ४ नंबर कांदा - २०० ते ६००
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.