Power Supply : सुरळीत वीजपुरवठ्यासाठी रामेश्वर येथे ‘रास्ता रोको’

Marathwada News : औंढा नागनाथ तालुक्यातील रामेश्वर येथील ‘महावितरण’च्या ३३ के. व्ही. केंद्रावरून २४ तासांपैकी दिवसभरात ३ ते ४ तास वीजपुरवठा केला जात आहे. त्यामुळे पिकांना पाणी देता येत नाही. कृषिपंपांचा वीजपुरवठा सुरळीत करावा, या मागणीसाठी मंगळवारी (ता. ७) रामेश्वर (ता. औंढानागनाथ) येथील ३३ के. व्ही. केंद्रासमोर जिंतूर औंढा नागनाथ राज्य रस्त्यावर रास्ता रोको आंदोलन करण्यात आले.

औंढा नागनाथ तालुक्यातील रामेश्वर व साळणा येथील ३३ के. व्ही. केंद्राला जिंतूर येथून वीजपुरवठा केला जातो. परंतु मागील पंधरा दिवसांपासून २४ तासांपैकी दिवसभरात केवळ ३ ते ४ तास वीजपुरवठा केला जात आहे.

यामुळे रामेश्वर व साळणा परिसरातील शेतकऱ्यांना शेतातील पिकांना पाणी देता येत नाही. कृषिपंपांचा वीजपुरवठा सुरळीत करावा, या मागणीचे निवेदन ‘महावितरण’च्या अधीक्षक अभियंत्यांना देण्यात आले.

ज्ञानेश्वर झटे, राजू मुसळे, बबनराव इघारे, सुधाकर वैद्य, माऊली मगर आदीसह रामेश्वर, बेरुळा, उंडेगाव, केळी, पेरजाबाद, रुपुर हिवरखेडा, येळी, अनखळी, पोटा खुर्द, नांदखेडा, उखळी, लांडाळा, चिंचोली निळोबा, दौडगाव, पारडी, साळणा या गावातील शेतकरी आंदोलनात सहभागी झाले. ‘रास्ता रोको’मुळे एक तास वाहतूक खोळंबली. औंढा तालुका ‘महावितरण’चे अभियंत्यांनी आश्वासन दिल्यानंतर आंदोलन मागे घेण्यात आले.