Neelkanthi Bird : जालना जिल्ह्यात पहिल्यांदाच आढळला नीलकंठी

Rare Birdwatching Survey : जिल्ह्यात बंगळूर येथील नेचर कंझर्व्हेशन फाउंडेशनने नुकत्याच केलेल्या पक्षी निरीक्षणातून हिवाळी स्थलांतरित, निळा कंठ असलेला ‘नीलकंठी’ नामक पक्षी पहिल्यांदाच आढळून आल्याचा दावा करण्यात आला. या निरीक्षणात जवळपास ७२ प्रकारच्या पक्ष्यांची ई-बर्ड ॲपवर नोंद घेण्यात आली.

जिल्ह्यात नुकतेच नेचर कंझर्व्हेशन फाउंडेशनच्या पक्षी तज्ज्ञांनी पाणथळ, गवताळ प्रदेश, झाडावर, जमिनीवर आढळणाऱ्या विविध पक्ष्यांचा अभ्यास करण्यासाठी मोती तलाव, घाणेवाडी येथील संत गाडगेबाबा जलाशय, पीरकल्याण प्रकल्प येथे पक्षी निरीक्षण करण्यासाठी भेटी दिल्या. त्यांना घाणेवाडी येथे ‘शंकर’ किंवा ‘नीलकंठी’ नामक पक्षी पहिल्यांदाच आढळला. या पक्ष्याला ‘ब्लू थ्रोट’ असे इंग्रजी नाव आहे.

या पक्षी निरीक्षणात जवळपास ७२ प्रकारच्या पक्ष्यांची ई-बर्ड या ॲपवर नोंद घेण्यात आली. नेचर कंझर्व्हेशन फाउंडेशनचे पक्षीतज्ज्ञ समाक्षी तिवारी, के. शशांक, अनिल कुमार आणि येथील स्थानिक पक्षीमित्र ज्ञानेश्वर गिराम यांच्या मदतीने हे पक्षी निरीक्षण नोंदवले आहेत.

जिल्ह्यात ७२ पक्ष्यांचा वावर

पक्षी निरीक्षणातून जवळपास ७२ प्रकारच्या पक्ष्यांची ई-बर्ड या ॲपवर नोंद घेण्यात आली. यामध्ये पानकावळे, रंगीत करकोचा, राखी बगळा, मोठा बगळा,लहान बगळा, गाय बगळा, खंड्या, कवड्या धीवर, हळदी कुंकू बदक, वारकरी बदक, चक्रवाक बदक, तुतवार, भिंगरी, हुद हुद, भारद्वाज, वेडा राघू, शिंजीर, पाकोळी, कांड्या करकोचा, चमचा बदक, कुदळ्या, राजहंस अर्थात पट्ट कदंब, अडई बदक, पाणलावा, नदी सुरय, चिरक, टिटवी, दयाळ, शिंपी, चिमणी, चंडोल, कबुतरे, कावळे, पोपट यासह एकूण ७२ पक्ष्यांचा जिल्ह्यात वावर असल्याचे दिसून आले.