Rain Update : साताऱ्यात अनेक ठिकाणी पाऊस

Satara Rain News : सातारा, खंडाळा, पाटण तालुक्यात रविवारी दुपारनंतर कमी जास्त प्रमाणात झालेल्‍या वादळी पाऊस झाला आहे. ढेबेवाडी खोऱ्याला आज वादळी पावसाने झोडपून काढले. दुपारनंतर विजांच्या कडकडाटात जोरदार पाऊस झाला. नागरिकांची त्यामुळे तारांबळ झाली. शिवारात, तसेच रस्त्यावर मोठ्या प्रमाणात पाणी साचून राहिले होते.

साताऱ्यासह विविध भागांत पावसाचा अंदाज वर्तवला होता. या अंदाजानुसार रविवारी दुपारी शहर परिसरातील आकाश काळ्या ढगांनी व्‍यापून गेले. साडेतीननंतर वादळी वारा आणि मेघगर्जनेसह मुसळधार पावसाने शहर परिसरात हजेरी लावली.

शहरासह परिसरात आणि तालुक्‍याच्‍या विविध भागास या पावसाने झोडपून काढले. दीड तासाहून अधिक काळ हा पाऊस शहर आणि परिसरात बरसत होता.

ढेबेवाडी विभागातील काही ठिकाणी घरांचेही वादळाने नुकसान झाले आहे. दुपारनंतर विजांच्या कडकडाटासह वादळी पाऊस सुरू झाला. रविवारी लग्नमुहूर्त असल्याने पावसामुळे वऱ्हाडी मंडळींची तारांबळ झाली. मंद्रुळकोळे येथील कृष्णात यादव यांच्या घराचे पत्रे वादळाने उडून नुकसान झाले.

पावसामुळे ओढेही खळखळून वाहिले. श्री क्षेत्र नाईकबा यात्रेनंतरच्या पाच पाकाळण्या गेल्या रविवारी संपल्या आहेत. पावसामुळे ठिकठिकाणी आंब्यांचे मोठ्या प्रमाणात नुकसान झाले आहे. ठिकठिकाणी झाडाखाली कैऱ्यांचा सडा पडल्याचे दिसून आले. या पावसामुळे खरीप पेरणीपूर्व मशागती सुलभ होणार असल्याचे शेतकऱ्यांनी सांगितले.