Rahul Gandhi : परदेशात जाऊन भारताचा अवमान करणे राहूल गांधींचा अजेंडा : भाजप

पुणे : राहूल गांधी (Rahul Gandhi) यांनी माफी न मागितल्यामुळे त्यांच्यावर कारवाई करण्यात आली आहे, अशी माहिती भाजप ज्येष्ठ नेते रविशंकर प्रसाद (Ravishankar Prasad) यांनी पत्रकार परिषद (ता.२५) घेऊन दिली आहे.

राहूल गांधींनी पत्रकार परिषद घेऊन भाजपवर केलेले आरोप देखील भाजपने यावेळी खोडले आहेत.

यावेळी रविशंकर प्रसाद म्हणाले की, देशाबाहेर जाऊन भारताचा अपमान करणे हा राहूल गांधींचा अजेंडा आहे. त्यामुळे राहूल गांधीविरोधात देशभर भाजप आंदोलन करणार आहे. तसंच त्यांनी भाजपवर केलेल्या आरोपांत कोणतीही तथ्य नाही, असंही ते म्हणाले.

तसंच जेव्हा सुरत कोर्टाने निर्णय दिला तेव्हा राहूल गांधींचे वकील कोर्टात का गेले नाहीत. त्यांनी कोर्टात जाऊन दाद मागायला हवी होती, असंही रविशंकर प्रसाद म्हणाले.

पंतप्रधान नरेंद्र मोदी आणि अदानींच नातं काय?, अदाणीच्या शेल कंपनीत २० हजार कोटी रुपये कुणाचे? असा सवाल राहूल गांधींनी केला आहे. याबाबत मात्र भाजप नेते रविशंकर प्रसाद यांनी मौन पाळलं होतं.