Tobacco Free Solapur : तंबाखूमुक्त सोलापूरसाठी लोकसहभाग वाढवावा

Solapur Tobacco News : कमावता युवक हा व्यसनाच्या आहारी गेल्यामुळे कुटुंब व्यवस्था तसेच सामाजिक व्यवस्था कोलमडली आहे. तंबाखूमुक्त सोलापूर करण्यासाठी लोकसहभाग वाढवून तंबाखूविरोधी चळवळ अधिक व्यापक करणे गरजेचे आहे, असे प्रतिपादन जिल्हा परिषद मुख्य कार्यकारी अधिकारी दिलीप स्वामी यांनी केले.

जागतिक तंबाखूविरोधी दिनानिमित्त पुण्यश्‍लोक अहिल्यादेवी विद्यापीठात महाविद्यालयीन विद्यार्थ्यांसाठी निबंध, वक्तृत्व स्पर्धेचे आयोजन करण्यात आले होते. त्याप्रसंगी ते बोलत होते. अध्यक्षस्थानी प्र. कुलगुरू डॉ. गौतम कांबळे होते.

याप्रसंगी कुलसचिव योगिनी घारे, समाज कल्याण अधिकारी सुनील खमितकर, सहायक पोलिस आयुक्त प्रांजली सोनवणे, जिल्हा शल्य चिकित्सक डॉ. धनंजय पाटील, विद्यापीठाचे एनएसएस विभाग प्रमुख राजेंद्र वडजे, नशाबंदी मंडळाचे रुस्तुम कंपनी उपस्थित होते. सोलापूर जिल्हा तंबाखू नियंत्रण कक्ष, नशाबंदी मंडळ महाराष्ट्र राज्य, सामाजिक न्याय व विशेष साह्य विभाग, पुण्यश्‍लोक अहिल्यादेवी होळकर सोलापूर विद्यापीठ, मराठवाडा ग्रामीण विकास संस्था संभाजीनगर, पोलिस आयुक्तालय, सारथी फाउंडेशनच्या वतीने या कार्यक्रमाचे आयोजन करण्यात आले होते.

डॉ. स्वामी म्हणाले, की तंबाखू व तंबाखूजन्य पदार्थांच्या व्यसनामुळे युवा पिढीला कर्करोगाचा विळखा बसत असून, मौखिक कर्करोगाचे प्रमाण वाढले आहे. वास्तविक, या दुष्परिणामांची माहिती असूनही तरुण त्याकडे वळत आहेत, हे दुर्दैवी आहे, असेही ते म्हणाले.

या वेळी प्रभारी कुलगुरू डॉ. गौतम कांबळे यांनी व्यसनाधीनता आणि सामाजिक व्यवस्था यावर मार्गदर्शन केले. युवा वर्गाला कर्करोगापासून वाचवण्यासाठी प्रभावी समुपदेशन करण्याची गरज त्यांनी व्यक्त केली.