Sangli News : शिराळा शहरानजीक असलेल्या मोरणा मध्यम प्रकल्पावर पिण्यासह शेतीच्या पाण्यासाठी अवलंबून असलेली जवळपास २० गावांना प्रकल्पातून पाणी मिळते. मात्र पाणीपुरवठा योजनेची ‘धरण उशाला व कोरड घशाला’ अशी अवस्था होण्याआधी शेतकऱ्यांना विश्‍वासात घेऊन योग्य नियोजन करावे, अन्यथा आंदोलन करण्यात येईल, अशा प्रतिक्रिया उमटू लागल्या आहेत.
७७६ एमसीएफटीची क्षमता आणि ६१० एमसीएफटीचा उपयुक्त जलसाठा असणाऱ्या मोरणा मध्यम प्रकल्पातील पाणी झपाट्याने कमी होऊ लागल्याने शेतकरी हवालदिल झाला आहे. धरणात सध्या ७३ टक्के पाणीसाठा आहे. गत वर्षी नोव्हेंबरमध्ये १०० टक्के पाणीसाठा होता. गत वर्षीच्या तुलनेत २७ टक्के साठा कमी झाला आहे.
सध्या मोरणा धरणातून सात दिवस पाणी सोडण्यात येते, तर आठ दिवस बंद, असे नियोजन आहे. मात्र हेही व्यवस्थित नाही. पाच हजार एकर अधिकृत पाणीपरवाना आहे. काही परवानाधारक शेतकऱ्यांनी धरणातील पाणी उचलून विहिरीत सोडून लाभक्षेत्राबाहेर जवळपास १० गावांना पाणी दिले आहे. याचा परिणाम पाणीसाठ्यावर होत आहे.
मे २०२३ मध्ये वारणा पाटबंधारे व सांगली पाटबंधारे या दोन्हीही विभागांचे वाकुर्डे योजनेच्या पाण्याचे नियोजन न केल्यामुळे ‘धरण उशाला अन् कोरड घशाला’ अशी शेतकऱ्यांची अवस्था झाली होती. जलाशयातील धरणापासून ते मांगलेपर्यंत धरणाखालील शेतकऱ्यांना याचा मोठा फटका बसला होता. बहुतांश पिके वाया गेली होती. अशीच अवस्था सप्टेंबरपासून ते आजअखेर आहे.
लाभक्षेत्रातील गावे
जलाशयातील ः शिराळा, एमआयडीसी तडवळे, उपवळे, अंत्री खुर्द, अंत्री बुद्रूक, पाडळी, पाडळेवाडी
धरणाखालील ः बिऊर, भाटशिरगाव, शिंगटेवाडी, जांभळेवाडी, धुमाळवाडी, चिखलवाडी, फकीरवाडी, इंग्रुळ व शिराळ्याचा काही भाग.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.