Sugarcane Season 2024 : गाळपात खासगी, तर साखर निर्मितीत सहकारी कारखान्यांची आघाडी

Satara News : जिल्ह्यात साखर हंगामात गती आली असून १६ साखर कारखान्यांनी २१ लाख २८ हजार ९६९ टन ऊस गाळपाद्वारे १७ लाख ३९ हजार ६३५ क्विंटल साखर निर्मिती केली आहे. जिल्ह्यात सरासरी ८.१७ टक्के साखर उतारा मिळत आहे.

हंगामाची सुरवात असल्याने साखर उतारा कमी असलातरी पुढील काळात साखर उतारा वाढणार आहे. विधानसभा निवडणुकांमुळे गाळप सुरू होण्यास विलंब झाल्याने हंगाम लांबणार आहे.

विधानसभा निवडणूका झाल्यावर सुरू झालेला साखर हंगामास आता गती आली आहे. जिल्ह्यात सध्या १६ साखर कारखान्यांचे गाळप सुरू झाले आहे. या १६ साखर कारखान्यांनी २१ लाख २८ हजार ९६९ टन ऊस गाळपाद्वारे १७ लाख ३९ हजार ६३५ क्विंटल साखर निर्मिती केली आहे. सध्या साखरेचा सरासरी उतारा ८.१७ टक्के मिळत आहे.

हंगामाची सुरवात असल्याने सध्या साखर उतारा कमी येत असून पुढील काळात साखर उतारा वाढणार आहे.गाळप खासगी कारखान्यांकडून आघाडी घेतली आहे. सात खासगी कारखान्यांनी १२ लाख १२ हजार ५४० टन गाळपाद्वारे आठ लाख २९ हजार २७५ क्विंटल साखर उत्पादन घेतले आहे.

नऊ सहकारी कारखान्यांकडून नऊ लाख १६ हजार ४२९ टन उसाचे गाळप करत नऊ लाख १० हजार ३६० क्विंटल साखर निर्मिती केली आहे. मात्र सहकारी कारखान्यांच्या तुलनेत खासगी कारखान्यांचा साखर उतारा कमी आहे. खासगी कारखान्यांना सरासरी ६.३८ टक्के तर सहकारी कारखान्यांचा ९.९३ टक्के उतारा मिळत आहे.

हंगाम सुरू होऊन बहुतांश कारखान्यांचे १५ दिवसांपेक्षा अधिक कालावधी झालेला आहे. कृष्णा व जयवंत शुगर कारखान्यांनी प्रतिटन ३२०० रुपये पहिली उचल जाहीर केलेली आहे. हा अपवाद वगळता इतर कारखान्यांनी ऊस दर जाहीर केलेला नाही. दर जाहीर करावा यासाठी वेगवेगळ्या शेतकरी संघटनांकडून प्रशासनास निवेदन दिली आहेत.

मात्र प्रशासनाकडून याबाबत अजूनही साखर कारखानदार व संघटनांची बैठक घेण्यासाठी हालचाल केलेली नाही. ऊस दर जाहीर होत नसल्यामुळे शेतकऱ्यांत नाराजी आहे. हंगाम सुरू होण्यास उशीर झाल्यामुळे संघटनांकडून आंदोलन केली जात नाही या फायदा कारखान्यांकडून घेतला जात असून दर जाहीर न करता ऊस गाळप केला जात आहे.

तोडणी यंत्रणा विस्कळित...

ऊस तोडणी मजूर यंत्रणा सर्वच कारखान्यांच्या दृष्टीने डोकेदुखी ठरत आहेत. ऊस तोड मजूर वांरवार फसवणूक होत असल्याने अनेक शेतकऱ्यांना हा कर्जबाजारी केल्याने सोडून द्यावा लागला आहे.

फसवणुकीच्या प्रकारामुळे बहुतांश कारखान्यांनी अजूनही तोडणी यंत्रणा विस्कळित झाली आहे. यामुळे काही कारखान्यांकडून सुरवातीपासून ऊस तोडणीसाठी हार्वेस्टरचा वापर केला जात आहे. मात्र हार्वेस्टर अजूनही मर्यादा असल्याने तोडणीसाठी मजूराची प्रतिक्षा केली जात आहे.