PM Modi : पंतप्रधान नरेंद्र मोदी शुक्रवारी सोलापूरच्या दौऱ्यावर

Solapur News : कुंभारी येथील रे नगर येथे असंघटित क्षेत्रातील लाभार्थ्यांसाठी पंतप्रधान आवास योजनेअंतर्गत ३० हजार घरकुलाचा प्रकल्प उभारण्यात येत असून, त्यातील पहिल्या टप्प्यातील १५ हजार घरकुलांचे वितरण शुक्रवारी (ता. १९) पंतप्रधान नरेंद्र मोदी यांच्या हस्ते होणार आहे.

त्या पार्श्वभूमीवर या गृहप्रकल्पातील कामाचा तसेच कार्यक्रमाच्या पूर्वतयारीचा आढावा पालकमंत्री चंद्रकांत पाटील यांनी रविवारी (ता. १४) घेऊन संबंधितांना मार्गदर्शक सूचना दिल्या.

यावेळी उपमुख्यमंत्री देवेंद्र फडणवीस यांचे प्रधान सचिव श्रीकर परदेशी, खासदार जय सिद्धेश्वर महास्वामी, विभागीय आयुक्त सौरभ राव, जिल्हाधिकारी कुमार आशीर्वाद, मनपा आयुक्त शितल तेली-उगले, शहर पोलीस आयुक्त राजेंद्र माने, पोलीस अधीक्षक शिरीष सरदेशपांडे,

मुख्य कार्यकारी अधिकारी मनिषा आव्हाळे, रे नगर फेडरेशनचे प्रवर्तक, माजी आमदार नरसय्या आडम, अपर जिल्हाधिकारी तुषार ठोंबरे, रेनगरच्या चेअरमन नलिनी कलबुर्गी, सचिव युसुफ शेख उपस्थित होते.

पालकमंत्री पाटील म्हणाले, हा गृह प्रकल्प जगातील सर्वात मोठा गृह प्रकल्प असून, यातून तीस हजार कुटुंबाच्या घराचे स्वप्न पूर्ण होत आहे.

पंतप्रधान मोदी यांच्या हस्ते होणाऱ्या घरकुल वितरण कार्यक्रमाच्या अनुषंगाने कोणत्याही प्रकारची कमतरता राहणार नाही, यासाठी प्रशासनाने योग्य ती दक्षता घ्यावी.

कार्यक्रमाच्या ठिकाणी लाभार्थी व नागरिक यांना ने -आण करण्यासाठी रे नगर फेडरेशन यांनी योग्य नियोजन करावे. पोलीस विभागाने कायदा व सुव्यवस्था अबाधित राखण्यासाठी सूक्ष्म नियोजन करावे.

घरकुल वितरणाचा कार्यक्रम शांततेत पार पडेल, यासाठी सर्व शासकीय यंत्रणा व रे नगर प्रकल्पाच्या संबंधित यंत्रणांनी परस्परात समन्वय ठेवून कार्यक्रम यशस्वी पार पडेल, याची दक्षता घ्यावी, असेही त्यांना सूचित केले.

यावेळी पालकमंत्री पाटील यांनी रे नगर येथील मॉडेल घराची पाहणी केली. तसेच कार्यक्रमासाठी तयार करण्यात येत असलेल्या सभा ठिकाणाचीही पाहणी करून व्यासपीठ तसेच किती नागरिक सभामंडपात बसू शकतात या अनुषंगाने माहिती घेतली.