Alandi Kartiki Wari : आळंदीतील कार्तिकी वारी सोहळ्यासाठी तयारी पूर्ण

Pune News : कार्तिकी वारी सोहळ्यासाठी मंगळवारी (ता.२६) राज्यभरातून आळंदीत येणाऱ्या भाविकांना दर्शन मंडपात खिचडी, चहा, केळी आणि पिण्याच्या पाण्याची सेवा मोफत दिली जाणार आहे. दरम्यान, भाविकांची सुरक्षितता जपण्यासाठी आणि मंदिर परिसरात चोऱ्या होऊ नये यासाठी देवस्थानच्या व्यवस्थापनाने नव्वद सीसीटीव्ही कॅमेरे बसविले आहेत.

याबाबत अधिक माहिती देताना आळंदी देवस्थानचे व्यवस्थापक ज्ञानेश्वर वीर यांनी सांगितले, की दर्शन मंडपात आणि मंदिराच्या भोवती चोऱ्या रोखण्यासाठी, चोरांवर नजर ठेवण्यासाठी नव्वद सीसीटीव्ही उभारले आहेत.

याचबरोबर मंदिराच्या आतील बाजूस, दर्शन मंडपात आणि प्रवेशद्वारात पोलिसांचा बंदोबस्त ठेवला जाणार आहे. वारी काळात संत ज्ञानेश्वर माऊलींच्या संजीवन समाधीचे लाइव्ह दर्शनाची सोय देवस्थानने केली आहे.

यासाठी मंदिरात, दर्शन मंडपात आणि पुंडलिक मंदिरात स्क्रीन बसवले जाणार आहेत. वारीसाठी बाहेरून येणाऱ्या दिंड्यांना देवस्थानकडून निमंत्रण दिले आहेत. दिंड्याचे मंदिर प्रवेश पासवाटप सुरू आहे. सप्तमी आणि अष्टमीच्या दिवशी दिंड्यांना प्रवेश दिला जाईल.

सध्या देवूळवाड्यावर विद्युत रोषणाई करण्याचे काम सुरू आहे. याचबरोबर वारी काळात देवूळवाडा, समाधी गाभारा आकर्षक फुलांनी सजविला जाणार आहे. द्वादशीच्या दिवशी करण्यात येणाऱ्या रथोत्सवासाठी देवस्थानने जुना लाकडी रथ तयार ठेवला आहे. रथाचे स्वच्छता आणि त्यावर आकर्षक विद्युत रोषणाईचे काम सुरु आहे.