Amravati News : राज्यातील आदिवासी आणि दुर्गम डोंगराळ भागातील गर्भवती महिलांसाठी माहेरघर योजना आधारवड ठरणार, अशी आशा आरोग्य विभागाला वाटत होती. त्यामुळे मेळघाटातील अकरा आरोग्यकेंद्रांपैकी नऊ प्राथमिक आरोग्यकेंद्रात माहेरघर योजना सुरू केली. मात्र योजनेच्या सुरवातीपासूनच या योजनेला गर्भवती महिलांनी प्रतिसाद दिला नाही. त्यामुळे मेळघाटातील हक्काचे माहेरघर आज नावालाच उरले आहे.
मेळघाटसह राज्यातील आदिवासी आणि दुर्गम डोंगराळ भागातील दरवर्षी होणाऱ्या मातामृत्यूला आळा बसेल, हा दृष्टिकोन डोळ्यांसमोर ठेवून आरोग्य विभागाने गर्भवती महिलांसाठी माहेरघर योजना सुरू केली.
सदर योजना ही मेळघाटातील अकरा प्राथमिक आरोग्यकेंद्रांपैकी नऊ प्राथमिक आरोग्यकेंद्रांत सुरू करण्यात आली आहे. मात्र योजनेच्या सुरवातीपासूनच गर्भवती महिलांनी माहेरघरला प्रतिसाद दिला नाही. परिणामी मेळघाटात या योजनेचा पाहिजे तेवढा आरोग्य विभागाला लाभ होताना दिसून येत नाही.
माहेरघर योजनेंतर्गत गर्भवती महिलांना प्रसूतीच्या चार ते पाच दिवस आधी आरोग्य संस्थांमध्ये दाखल केले जाते. त्यांना माहेरघर योजनेच्या माध्यमातून सर्वंकष सेवा दिली जाते, जेणेकरून प्रसूतीदरम्यान कोणतीही अडचण निर्माण होणार नाही आणि प्रसूती सुखरूप होण्यास मदत होईल.
मात्र मेळघाटात सुरवातीपासूनच या योजनेला गर्भवती महिलांचा प्रतिसाद मिळाला नाही. त्यामुळे की काय आजही मातामृत्यूला आरोग्य विभागाकडून शून्य उद्दिष्टपूर्ती करण्यास यश मिळण्यास विलंब होत असल्याचे दिसून येत आहे. गर्भवती मातांच्या अल्प प्रतिसादामुळे आरोग्य कर्मचारीसुद्धा हतबल झाले आहेत. ज्यामुळे गर्भवती महिलांच्या प्रसूतीच्या दृष्टीने अत्यंत महत्त्वाचे असलेले माहेरघर आजरोजी नावालाच उरले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.