PM Kisan: किसान सन्मान योजना शेतकऱ्यांसाठी वरदान ठरणारी

Malegaon News: पंतप्रधान नरेंद्र मोदी यांच्या शुभहस्ते  ‘प्रधानमंत्री किसान सन्मान निधी’ योजनेच्या २० व्या हप्त्याचे वितरण देशभरातील ९ कोटी ७० लाख शेतकऱ्यांच्या खात्यात थेट जमा करण्यात आले. या योजनेतंर्गत एकूण २०,५०० कोटी रुपयांचे थेट हस्तांतरण ही बाब शेतकऱ्यांच्या आर्थिक सशक्तीकरणाचा निश्चितच मोठा टप्पा आहे.

पारदर्शक, डिजिटल आणि थेट लाभाच्या या योजनेने शेतकऱ्यांच्या सन्मानात आणि आत्मविश्वासात वाढ केली आहे, असे प्रतिपादन केंद्रीय सहकार व हवाई वाहतूक राज्यमंत्री मुरलीधर मोहोळ यांनी शनिवारी (ता. २) केले.

बारामती-शारदानगर येथील अॅग्रिकल्चर डेव्हलपमेंट ट्रस्ट येथे पी. एम. किसान सन्मान निधी वाटपाच्या कार्यक्रमाच्या अनुषंगाने केंद्रीय सहकार व हवाई वाहतूक राज्यमंत्री मुरलीधर मोहोळ आले होते. यावेळी आयोजित शेतकरी मेळाव्यात मंत्री मोहोळ बोलत होते. यावेळी उत्तरप्रदेश येथील वाराणसी येथून पंतप्रधान नरेंद्र मोदी यांच्या कार्यक्रमाचे व्हरचुअल प्रक्षेपण उपस्थितांनी पाहीले.

यावेळी भाजपचे ज्येष्ठ नेते रंजन तावरे, भाजपचे जिल्हाध्यक्ष शेखर वडणे, माजी जिल्हा सरचिटणी अविनाश मोठे, अॅग्रीकल्चर डेव्हलपमेंट ट्रस्टचे सीईओ डॉ. नीलेश नलावडे, कृषी शास्त्रज्ञ डॉ. धीरज शिंदे, डॉ. विवेक भोईटे, डॉ. मिलिंद जोशी, डॉ. संतोष गद्ररे, राजेश कांबळे यांच्यासह शेतकरी उपस्थित होते.

मंत्री श्री.मोहोळ यांनी केंद्र सरकारकडून ग्रामीण भागासाठी आणि शेतकऱ्यांच्या हितासाठी सुरू असलेल्या योजना वास्तवात कशा उतरत आहेत याची माहिती आपल्या भाषणात सांगितली. श्री. मोहोळ म्हणाले, की पंतप्रधान मोदीजींच्या नेतृत्वातील सरकार शेतकरी आणि ग्रामीण भागाच्या सर्वांगीण विकासासाठी जे प्रयत्न करत आहे, ते निश्चितच परिवर्तन घडवणारे आहेत.

शेती आणि शेती पुरक व्यवसाय करताना शेतकऱ्यांना आर्थिकदृष्ट्या या रकमेचा फायदा होतो. ९ कोटी ७० लाखांपेक्षा अधिक शेतकरी कुटुंबांना या योजनेचा लाभ मिळतो आहे. तत्पूर्वी बारामतीमधील प्रयोगशील शेतकऱ्यांचा यावेळी मंत्री मोहोळ यांच्या हस्ते प्रशस्तीपत्रक देत सन्मान झाला.