Water Supply Scheme : पाइपलाइन टाकण्याचे काम रेंगाळल्याने अडचण

Nagpur News : नरखेड तालुक्यातील जलालखेडा येथे नवीन पाणीपुरवठा करणाऱ्या पाइपलाइनचे काम सुरू आहे. त्याकरिता भर पावसाळ्यात सिमेंटच्या रस्त्याचे खोदकाम करून ठेवण्यात आले होते. ते तेव्हापासून तसेच आहे, पण अद्यापही पाइपलाइन टाकण्यात आली नाही. त्यामुळे नागरिकांती मोठी अडचण होत आहे.

जलालखेडा येथील पाइपलाइन जुनी झाली असून ती खोल गेली आहे. यामुळे येथे एक कोटी खर्च करून नवीन पाइपलाइनच्या कामाला जलजीवन मिशन अंतर्गत मंजुरी देण्यात आली. या कामाची मुदत ही जुलै २०२४ पर्यंतच होती. पण अद्यापही काम पूर्ण झाले नाही. पाइपलाइनसाठी गावातील सिमेंट रस्ते तोडण्यात आले, अजूनही तसेच आहेत.

पण पाइपलाइन टाकण्यात आली नाही. पाइपलाईनचे काम करत असताना नागरिकांना कसलाही त्रास होणार नाही, याची कोणतीही काळजी घेण्यात आलेली नाही. नवीन बांधण्यात आलेले रस्ते मोठ्या प्रमाणात फोडण्यात आले. रस्त्यांवर सर्वत्र मातीचा ढिगारा पाहायला मिळत आहे.

नागरिकांना आपली वाहने घरी लावण्यात अडचण निर्माण होत आहे. तसेच सिमेंटचे रस्ते फोडल्यामुळे त्यातील लोखंडी सळाया बाहेर निघाल्यामुळे एखाद्याला दुखापत होण्याची शक्यता नाकारता येत नाही. विशेष म्हणजे पाइपलाइनचे काम बंद असून ग्रामपंचायत प्रशासनाचे याकडे लक्ष नाही तर दुसरीकडे ठेकेदार आपला मनमानी कारभार करीत आहे.

पाइपलाइन टाकली, नळ कोण देणार?

जलालखेडा येथे नवीन पाइपलाइन टाकण्याचे काम नियम धाब्यावर बसवत मोठ्या जोरात सुरू आहे. ऐन पावसात रस्त्याचे खोदकाम करून पाइपलाइन टाकल्या जात होत्या, पण तेही पूर्ण झाले नाही. परंतु पाइपलाइन टाकताना नागरिकांना नळ कनेक्शन दिले जात नसल्याने या पाइपलाइनचा उपयोग काय, असा प्रश्न नागरिक विचारत आहेत.

‘इस्टिमेट’मध्ये नळ कनेक्शन नाही

नवीन पाइप लाइनचे काम मोठ्या वेगाने व नियमाचे उल्लंघन करू सुरू असून या इस्टीमेटमध्ये नळ कनेक्शन नसल्याचे सांगण्यात येत आहे. त्यामुळे या पाइपलाइनचा उपयोग तरी काय, असा प्रश्न नागरिक विचारत आहे.

...अशी आहे स्थिती

चांगले रस्ते केले खराब, तरी पाइप टाकलेच नाही

रस्त्यांवर ये-जा करताना मोठा त्रास

नियम धाब्यावर ठेवून पाइपलाइनचे काम

संबंधित विभागाचा डोळेझाकपणा

चांगले सिमेंटचे रस्ते फोडून केले काम

ठेकेदाराचा मनमानी कारभार