Tur Variety : फुले पल्लवी तुरीचा वाण प्रसारित

Nagar News : महात्मा फुले कृषी विद्यापीठातील कडधान्य सुधार प्रकल्पाने विकसित केलेल्या फुले पल्लवी या (१२-१९-२) तुरीच्या नवीन वाणाला कानपूर (हैदराबाद) येथे झालेल्या अखिल भारतीय समन्वित संशोधन प्रकल्प खरीप कडधान्य वार्षिक संशोधन कार्यशाळेच्या बैठकीत मान्यता देऊन महाराष्ट्र, मध्य प्रदेश, छत्तीसगड, गुजरात आणि राजस्थान या राज्यांत लागवडीकरिता शिफारस करण्यात आली आहे.

महात्मा फुले कृषी विद्यापीठाच्या कडधान्य सुधार प्रकल्पाने फुले पल्लवी हा (१२-१९-२) तुरीचा नवीन सुधारित वाण विकसित केला आहे. विद्यापीठाने विकसित केलेला हा तुरीचा वाण आहे. कानपूर (हैदराबाद) येथे झालेल्या अखिल भारतीय समन्वित संशोधन प्रकल्प खरीप कडधान्य वार्षिक संशोधन कार्यशाळा झाली.

या कार्यशाळेत देशभरातील नवीन वाणांच्या प्रसारणाला मान्यता देण्यात आली. त्यात महात्मा फुले कृषी विद्यापीठाने विकसित केलेल्या फुले पल्लवी (१२-१९-२) या मध्यम पक्वता वाणाला मान्यता देण्यात आली. हा वाण देशाच्या मध्य भारतातील महाराष्ट्र, मध्य प्रदेश, छत्तीसगड, गुजरात आणि राजस्थान या राज्यांत लागवडीकरिता शिफारस करण्यात आली असल्याने त्याची लागवड करता येणार आहे.

महात्मा फुले कृषी विद्यापीठाचे कुलगुरू डॉ. पी. जी. पाटील, संशोधन संचालक डॉ. सुनील गोरंटीवार यांच्या मार्गदर्शनाखाली फुले पल्लवी (फुले तूर १२-१९-२) हा वाण विकसित करण्यामध्ये पीक पैदासकार तथा प्रमुख शास्त्रज्ञ डॉ. एन. एस. कुटे, वरिष्ठ संशोधन सहायक डॉ. व्ही. एम. कुलकर्णी, तूर रोगशास्त्रज्ञ डॉ. व्ही. ए. चव्हाण आणि तूर कीटकशास्त्रज्ञ डॉ. सी. बी. वायळ या शास्त्रज्ञांचे महत्त्वपूर्ण योगदान राहिले आहे.

वाणांचे वैशिष्ट्ये

फुले पल्लवी या वाणाचे वैशिष्ट्ये म्हणजे प्रति हेक्टरी सरासरी उत्पादन २१.४५ क्विंटल उत्पादन निघते. दाणे टपोरे फिकट तपकिरी रंगाचे आहेत. १०० दाण्यांचे वजन ११.० ग्रॅम भरते. तूर पिकातील मर व वांझ या प्रमुख रोगांना हा वाण मध्यम प्रतिकारक्षम आहे. शेंगा पोखरणारी अळी आणि शेंगमाशी या किडींना कमी बळी पडतो.