Soybean : सोयाबीन उत्पादकांना नुकसान भरपाई द्या

ॲग्रोवन वृत्तसेवा

वर्धा ः येलो मोझॅकसह मूळकुज व इतर कीडरोगामुळे यंदाच्या हंगामात सोयाबीन उत्पादक पूर्णपणे उद्ध्वस्त झाला आहे. त्यामुळे त्यांना सरसकट भरपाई देण्यात यावी, असा ठराव वर्धा बाजार समितीने घेतला आहे. आमसभेत घेण्यात आलेला हा ठराव जिल्हाधिकाऱ्यांमार्फत

शासनाला पाठविण्यात आल्याने शासनस्तरावर याप्रकरणी काय भूमिका घेतली जाते हे पाहणे औत्स्युक्‍याचे ठरणार आहे.

वर्धा बाजार समितीची २०२२-२३ या वर्षातील वार्षिक आमसभा बाजार समिती सभागृहात पार पडली. सभापती अमित गावंडे हे अध्यक्षस्थानी होते. सभेत जिल्हा काँग्रेस कमिटीचे अध्यक्ष मनोज चांदूरकर यांनी सोयाबीन पिकाच्या नुकसानीचा मुद्दा उपस्थित केला.

सोयाबीनची उत्पादकता सातत्याने कमी होत असताना या वर्षी तर हे पीक पूर्णपणे कीड-रोगाने पोखरले आहे. त्यामुळे शेतकऱ्यांना सरसकट भरपाई मिळाली पाहिजे, असे ते म्हणाले. ही बाब सर्वांनुमते मान्य करीत सोयाबीन उत्पादकांना भरपाई मिळण्यासंदर्भातील ठराव संमत करण्यात आला. सभापती अमित गावंडे, उपसभापती पांडुरंग देशमुख, संचालक विलास मेघे, पुरुषोत्तम टोणपे, पवन गोडे, संदीप देशमुख, संदीप शिंदे, अमित देशमुख, प्रफुल्ल कुचेवार, दिनेश गायकवाड, महेश भुतडा, विशाल तिवारी, मुकुंद बेलखेडे, वैशाली उमाटे, सोनल भोगे यांच्यासह ग्रामपंचायत सरपंच, सेवा सोसायटीचे पदाधिकारी, अडते, व्यापारी, बाजार समिती सचिव समीर पेंडके उपस्थित होते.

राज्यात पहिलाच ठराव

यंदा सोयाबीन पीक कीड-रोगांनी पोखरले आहे. एकट्या विदर्भात १७.५० लाख हेक्‍टरपैकी दोन लाख हेक्‍टर क्षेत्र बाधित असल्याचे सांगितले जाते. त्या पार्श्‍वभूमीवर शेतकऱ्यांना भरपाई मिळावी, अशी मागणी करणारी वर्धा राज्यातील एकमेव बाजार समिती ठरली आहे.