Papaya Cultivation : पपई लागवडीस खानदेशात गती; शहाद्यातील क्षेत्र कमीच राहणार

Jalgaon News : जळगाव ः पपईची लागवड खानदेशात गती घेत आहे. पपईसाठी प्रसिद्ध असलेल्या नंदुरबारातील शहादामधील लागवड यंदाही कमी राहील, असे दिसत आहे. अनेक शेतकरी दसरा, दिवाळी सणातील बाजारपेठ हेरण्यासाठी लागवड करीत आहेत.

मागील महिन्यात लागवड सुरू झाली. परंतु लागवड या आठवड्यात अधिक गतीने सुरू आहे. खानदेशात यंदा सुमारे सात ते साडेसात हजार हेक्टरवर पपईची लागवड होईल. शहादा तालुक्यातील लागवड सर्वाधिक चार ते साडेचार हजार हेक्टरपर्यंत असते. यंदा शहाद्यातील लागवड साडेतीन हजार हेक्टरपर्यंत राहील, अशी स्थिती आहे.

शहाद्यातील लागवडीत मागील हंगामात सुमारे १४०० हेक्टरने घट झाली. नंदुरबारात पपईची साडेपाच हजार हेक्टरवर लागवड केली जाते. एकट्या शहाद्यातील लागवड २०२२ मध्ये साडेचार हजार हेक्टर एवढी होती. परंतु पपईचे दर कोसळले व नैसर्गिक समस्यांचा पपईस फटका बसला. यामुळे शहाद्यातील पपई लागवड घटली. मागील हंगामातही पपईस दर हवा तसा नव्हता. यामुळे पपई लागवड मागील हंगामातही वाढली नव्हती.

यंदाही लागवड सात ते साडेसात हजार हेक्टरवर राहील. नंदुरबारातील लागवड चार हजार हेक्टर एवढी अपेक्षित आहे. धुळ्यात सुमारे १२०० ते १३०० हेक्टरवर पपई पीक राहील. धुळ्यातील शिरपूर तालुक्यात सर्वाधिक ८०० ते ९०० हेक्टरवर पपई लागवड होईल. तर जळगावात सुमारे १५०० ते १६०० हेक्टरवर पपई पीक असणार आहे.

जळगाव जिल्ह्यात चोपडा, यावल, रावेर, मुक्ताईनगर, जामनेर, पाचोरा, जळगाव, धरणगाव या भागात पपई पीक असणार आहे. सर्वाधिक लागवड चोपडा, यावल भागात होईल, अशी स्थिती आहे. पपई लागवड मागील महिन्यात सुरू झाली आहे. मागील चार ते पाच दिवसांपासून लागवडीस गती आली आहे. अनेक शेतकरी कलिंगड पिकात पपईची लागवड करून घेत आहेत. काळ्या कसदार जमिनीत पपई पीक जोमात येत.

यामुळे काळ्या कसदार क्षेत्रात पीक अधिक आहे. हलक्या, मध्यम क्षेत्रात पपई लागवड शेतकरी टाळत आहेत. लागवड नऊ बाय सात, आठ बाय आठ, सहा बाय सहा फूट या अंतरात उंच गादीवाफा व ठिबक सिंचन तंत्राच्या साह्याने केली जात आहे. लागवडीसाठी ७८६, १५ नंबर व अन्य सुधारित, संकरित पपई वाणांचा उपयोग केला जात आहे. चवीला गोड, गर्द केशरी गर व गोलाकार, लांब वाहतुकीसाठी सुकर आणि मोठ्या फळांना मागणी असते. यामुळे अशा वाणांना लागवडीसाठी शेतकरी पसंती देत आहेत.